ന്യൂഡല്ഹി: കേരളത്തെ ചേര്ത്ത് ധാതു മണല് ഇടനാഴി പ്രഖ്യാപിച്ച് ധനമന്ത്രി നിര്മല സീതാരാമന്. പാര്ലമെന്റില് കേന്ദ്ര ബജറ്റ് അവതരണത്തിനിടെയാണ് പ്രഖ്യാപനം. ധാതു സമ്പന്നമായ സംസ്ഥാനങ്ങളെ ചേര്ത്താണ് പദ്ധതി നടപ്പാക്കുക. കേരളത്തെ കൂടാതെ ഒഡീഷ, ആന്ധ്രാപ്രദേശ്, തമിഴ്നാട് എന്നിവയുള്പ്പെടെയുള്ള ധാതു സമ്പന്നമായ സംസ്ഥാനങ്ങള്ക്ക് പിന്തുണ നല്കുമെന്ന് മന്ത്രി പ്രഖ്യാപിച്ചു.
പദ്ധതിയുടെ ഭാഗമായി ഖനനം, സംസ്കരണം എന്നിവടയക്കം വര്ധിപ്പിക്കും. നേരത്തെ കേരളത്തിലെ ബജറ്റിലും ധാതു ഇടനാഴി സംബന്ധിച്ച പ്രഖ്യാപനമുണ്ടായിരുന്നു. വിഴിഞ്ഞം തുറമുഖത്തെ ചവറയിലേക്കും തുടര്ന്ന് കൊച്ചിയിലേക്കും ബന്ധിപ്പിക്കുന്ന ഒരു അപൂര്വ ഭൂമി ഇടനാഴി വികസിപ്പിക്കാന് കേരള സര്ക്കാര് പദ്ധതിയിടുന്നുണ്ടെന്ന് വ്യാഴാഴ്ച ബജറ്റ് പ്രസംഗത്തില് ധനമന്ത്രി കെ എന് ബാലഗോപാല് പറഞ്ഞു.
”വിഴിഞ്ഞം തുറമുഖത്തെ ചവറയുമായി ബന്ധിപ്പിക്കുന്ന ഒരു പുതിയ അപൂര്വ ഭൂമി ഇടനാഴി ആസൂത്രണം ചെയ്തിട്ടുണ്ട്, ഇത് കൊച്ചിയുമായി ബന്ധിപ്പിക്കുന്നു. കെഎംഎംഎല് ചവറയ്ക്ക് സമീപം ഇതുമായി ബന്ധപ്പെട്ട ഒരു കേന്ദ്രം സ്ഥാപിക്കും. ഇതിലൂടെ കേരളം രാജ്യത്തിന്റെ സ്ഥിരം മാഗ്നറ്റ് ഹബ്ബായി മാറുകം. ഇതിനുപുറമെ, 42,000 കോടി രൂപയുടെ നിക്ഷേപവും 50,000 തൊഴിലവസരങ്ങളും പ്രതീക്ഷിക്കുന്നു,” അദ്ദേഹം പറഞ്ഞു.
കെഎംഎംഎല്, കെല്ട്രോണ്, എന്എഫ്ടിഡിസി എന്നിവയുമായി സഹകരിച്ച് ഒരു റെയര് എര്ത്ത് ക്രിട്ടിക്കല് മിനറല്സ് മിഷന് സ്ഥാപിക്കുന്നതിന് 100 കോടി നീക്കിവച്ചിട്ടുണ്ടെന്നും അദ്ദേഹം പ്രഖ്യാപിച്ചിരുന്നു. ചവറ ആസ്ഥാനമായുള്ള ഒരു സര്ക്കാര് ഉടമസ്ഥതയിലുള്ള സ്ഥാപനവും ടൈറ്റാനിയം ഡൈ ഓക്സൈഡിന്റെയും ധാതു മണലിന്റെയും പ്രധാന ഉല്പാദകരുമാണ് കേരള മിനറല്സ് ആന്ഡ് മെറ്റല്സ് ലിമിറ്റഡ് (കെഎംഎംഎല്).
സംസ്ഥാന ഉടമസ്ഥതയിലുള്ള ഇലക്ട്രോണിക്സ്, സാങ്കേതിക സംരംഭമാണ് കേരള സ്റ്റേറ്റ് ഇലക്ട്രോണിക്സ് ഡെവലപ്മെന്റ് കോര്പ്പറേഷന് (കെല്ട്രോണ്). ഖനി മന്ത്രാലയത്തിന് കീഴിലുള്ള ഒരു സ്വയംഭരണ ഗവേഷണ വികസന സ്ഥാപനമാണ് നോണ്ഫെറസ് മെറ്റീരിയല്സ് ടെക്നോളജി ഡെവലപ്മെന്റ് സെന്റര് (എന്എഫ്ടിഡിസി). ബിപിസിഎല്ലുമായി സഹകരിച്ച് കൊച്ചി ഇന്റര്നാഷണല് എയര്പോര്ട്ട് ലിമിറ്റഡ് ഇതിനകം ഒരു ഗ്രീന് ഹൈഡ്രജന് ഡിസ്പെന്സിങ് യൂണിറ്റ് സ്ഥാപിച്ചിട്ടുണ്ട്.
കേരളത്തില് ഹൈഡ്രജന് വാലി ഇന്നൊവേഷന് ക്ലസ്റ്ററുകള്ക്കും കേന്ദ്രം അംഗീകാരം നല്കിയിട്ടുണ്ട്. ലോക സാമ്പത്തിക ഫോറത്തില് ഗ്രീന്കോയില് നിന്ന് പുനരുപയോഗ ഊര്ജ്ജ മേഖലയില് 10,000 കോടി രൂപയുടെ നിക്ഷേപം ആകര്ഷിച്ചിരുന്നു. ഹെഡ്രജനുമായി ബന്ധപ്പെട്ട പ്രവര്ത്തനങ്ങള്ക്ക് കൂടുതല് വിഹിതം അനുവദിക്കാന് പദ്ധതിയിട്ടിട്ടുണ്ട്.
