മലയാളികളുടെ പ്രിയപ്പെട്ട താരങ്ങളിൽ ഒരാളായ അനുശ്രീക്ക് ആരാധകരുടെ മനസ്സിൽ ഒരു പ്രത്യേക സ്ഥാനമുണ്ട്. നാടൻ പെൺകുട്ടിയുടെ വേഷങ്ങളായാലും മോഡേൺ കഥാപാത്രങ്ങളായാലും അനായാസമായി കൈകാര്യം ചെയ്യുന്ന അനുശ്രീ സോഷ്യൽ മീഡിയയിലും സജീവമാണ്. ആരാധകർക്കിടയിൽ എന്നും ചർച്ചയാകുന്ന ഒരു വിഷയമാണ് അനുശ്രീയുടെ വിവാഹം. ഇപ്പോഴിതാ, നടി അതിഥി രവിയുമായുള്ള ഒരു അഭിമുഖത്തിൽ വിവാഹത്തെക്കുറിച്ചും തന്റെ സങ്കൽപ്പങ്ങളെക്കുറിച്ചും തുറന്നുപറഞ്ഞിരിക്കുകയാണ് അനുശ്രീ.
അനുശ്രീയുടെ വാക്കുകളിലേക്ക്:
“വിവാഹം, റിലേഷൻ, പ്രണയം എന്നീ വിഷയങ്ങൾ ഞാനും അതിഥിയുമായി എപ്പോഴും സംസാരിക്കാറുണ്ട്. അതുകൊണ്ടായിരിക്കാം അവൾ ഈ ചോദ്യം ചോദിച്ചത്,” അനുശ്രീ ചിരിച്ചുകൊണ്ട് പറഞ്ഞു. “ഞാൻ ഇപ്പോൾ കല്യാണം കഴിക്കാൻ തീരുമാനിച്ചിട്ടില്ല. പക്ഷെ എന്റെ സങ്കൽപ്പങ്ങളെക്കുറിച്ച് പറയുകയാണെങ്കിൽ, എനിക്ക് ഏറ്റവും ഇഷ്ടപ്പെട്ട ജോലി സിനിമയിൽ അഭിനയിക്കുക എന്നതാണ്. ആരോഗ്യമുള്ളിടത്തോളം കാലം ഒരു നിയന്ത്രണവുമില്ലാതെ എന്നെ അഭിനയിക്കാൻ വിടുന്ന ഒരാളായിരിക്കണം എന്റെ പങ്കാളി. അതിനാണ് ഞാൻ ആദ്യം പരിഗണന നൽകുന്നത്.”
“കഴിഞ്ഞ 34 വർഷമായി ഞാൻ താമസിക്കുന്ന വീട്ടിൽ നിന്ന് മറ്റൊരു സ്ഥലത്തേക്ക് മാറാൻ എനിക്ക് ഇപ്പോൾ സാധിക്കില്ല. അതുകൊണ്ട് ഇങ്ങോട്ട് വരാൻ താല്പര്യമുള്ള ഒരാളെയാണ് ഞാൻ നോക്കുന്നത്,” അനുശ്രീ തന്റെ ആഗ്രഹം വ്യക്തമാക്കി. “അതുകൊണ്ട് ഞങ്ങൾ മാട്രിമോണിയിൽ ഇങ്ങനെ ഒരു പരസ്യം കൊടുക്കും: ‘എന്റെ വീട്ടിൽ വന്ന് താമസിക്കാൻ ആഗ്രഹിക്കുന്നവരിൽ നിന്ന് മാത്രം ആലോചനകൾ ക്ഷണിക്കുന്നു.’ സ്വന്തമായി മറ്റൊരു വീട് വെക്കേണ്ട ടാസ്കുകളൊക്കെയുള്ള ഇളയ മക്കൾ ഉണ്ടാകില്ലേ? അവർക്ക് മറ്റൊരു വീട് വെക്കേണ്ട, എന്റെ വീട്ടിലേക്ക് കൊണ്ടുവരാം,” അനുശ്രീ തമാശയോടെ കൂട്ടിച്ചേർത്തു.
അനുശ്രീയുടെ ഈ തുറന്നുപറച്ചിൽ ഇതിനോടകം തന്നെ സോഷ്യൽ മീഡിയയിൽ വൈറലായിരിക്കുകയാണ്. താരത്തിന്റെ നിഷ്കളങ്കവും വ്യക്തവുമായ ഈ അഭിപ്രായങ്ങളെ നിറഞ്ഞ കൈയ്യടികളോടെയാണ് ആരാധകർ സ്വീകരിച്ചിരിക്കുന്നത്.
