രാജ്യത്ത് 27 വിമാനത്താവളങ്ങൾ മെയ് 10 വരെ അടച്ചു

1175
Advertisement

ന്യൂഡൽഹി : ഓപ്പറേഷൻ സിന്ദൂറിന്റെ പശ്ചാത്തലത്തിൽ രാജ്യത്ത് 27 വിമാനത്താവളങ്ങൾ അടച്ചു. സുരക്ഷയെ മുൻനിർത്തിയാണ് അതിർത്തി മേഖലകളിലടക്കമുള്ള വിമാനത്താവളങ്ങൾ മെയ് 10 വരെ അടച്ചത്. ഇവിടങ്ങളിൽ നിന്നുള്ള വിമാന സർവീസുകളെല്ലാം റദ്ദാക്കി. ഏകദേശം 300ലധികം വിമാന സർവീസുകളാണ് വിവിധ എയർലൈനുകൾ റദ്ദാക്കിയത്. രാജസ്ഥാൻ, ​ഗുജറാത്ത്, പഞ്ചാബ്, ജമ്മു കശ്മീർ, ചണ്ഡീ​ഗഡ്, ഉത്തർപ്രദേശ് എന്നിവിടങ്ങളിലെ വിമാനത്താവളങ്ങളാണ് പ്രധാനമായും അടച്ചത്. ചില വിമാനത്താവളങ്ങളുടെ നിയന്ത്രണം വ്യോമസേന ഏറ്റെടുത്തിട്ടുണ്ട്.

ചണ്ഡീ​ഗഡ്, ശ്രീന​ഗർ, അമൃത്‍സർ, ലുധിയാന, ഭുന്താർ, കൃഷ്ണഘട്ട്, പട്യാല, ഷിംല, ധർമശാല, ഭട്ടിൻഡ, ജയ്സാൽമീർ, ജോധ്പൂർ, ബിക്കാനീർ, ഹൽവാര, പത്താൻകോട്ട്, ജമ്മു, ലേ, മുന്ദ്ര, ജാംന​ഗർ, രാജ്കോട്ട്, പോർബന്തർ, കണ്ട്ല, കെഷോധ്, ഭുജ്, തോയിസ് എയർ ഫോഴ്സ് സ്റ്റേഷൻ ലഡാക്ക്, ​ഗ്വാളിയോർ, ഹിന്ദോൺ എന്നീ വിമാനത്താവളങ്ങളാണ് അടച്ചത്.

രാജ്യതലസ്ഥാനമായ ഡൽഹിയിലെ വിമാനത്താവളത്തിൽ പ്രത്യേക സുരക്ഷയും ജാ​ഗ്രത നിർദേശങ്ങളും നൽകിയിട്ടുണ്ട്. വിമാനസർവീസുകളെപ്പറ്റിയുള്ള കൃത്യമായ വിവരങ്ങൾക്കായി യാത്രക്കാർ എയർലൈൻ അധികൃതരെ ബന്ധപ്പെടണമെന്നും അറിയിപ്പുണ്ട്. എയർഇന്ത്യ, ഇൻഡി​ഗോ, ആകാശ എയർ, സ്പൈസ്ജെറ്റ് തുടങ്ങിയ ആഭ്യന്തര എയർലൈനുകളും വിദേശ എയർലൈനുകളും സർവീസുകൾ റദ്ദാക്കുകയോ വഴി തിരിച്ചുവിടുകയോ ചെയ്തു. 165ഓളം സർവീസുകൾ റദ്ദാക്കിയെന്ന് ഇൻഡി​ഗോ വക്താവ് അറിയിച്ചിരുന്നു. ബുധൻ പുലർച്ചെയാണ് പാകിസ്ഥാൻ, പാക് അധിനിവേശ കശ്മീരിലെ (പിഒകെ) ഒമ്പത് ഭീകര കേന്ദ്രങ്ങളിൽ ഇന്ത്യ മിസൈൽ ആക്രമണങ്ങൾ നടത്തിയത്. ഓപ്പറേഷൻ സിന്ദൂർ എന്ന പേരിലായിരുന്നു ഭീകരകേന്ദ്രങ്ങൾക്കുനേരെയുള്ള ആക്രമണം.

Advertisement