ടി20 ലോകകപ്പില് ഇന്ത്യയുമായുള്ള മത്സരം ബഹിഷ്കരിക്കാന് പാകിസ്ഥാന് തീരുമാനിച്ചു. ഫെബ്രുവരി 15-ന് കൊളംബോയില് നടക്കേണ്ട പോരാട്ടത്തില് നിന്ന് പാക് ടീം വിട്ടുനില്ക്കുമെന്ന് പാകിസ്ഥാന് സര്ക്കാര് ഔദ്യോഗികമായി അറിയിച്ചു. ബംഗ്ലദേശിനെ ഒഴിവാക്കിയതില് പ്രതിഷേധിച്ചാണ് കടുത്ത തീരുമാനത്തിലേക്ക് പാക്കിസ്ഥാന് നീങ്ങിയത്. മറ്റ് മല്സരങ്ങളില് പങ്കെടുക്കാന് ടീമിന് അനുമതിയുണ്ടെന്നും പാക്കിസ്ഥാന് സര്ക്കാര് അറിയിച്ചു. ശ്രീലങ്കയിലാണ് പാക്കിസ്ഥാന്റെ മറ്റ് മല്സരങ്ങള്. ഇന്ത്യയ്ക്കെതിരെ കളിക്കില്ലെന്ന പാക്കിസ്ഥാന്റെ നിലപാടില് ഐസിസി പ്രതികരണം നിര്ണായകമാവും.
സുരക്ഷാ കാരണങ്ങളാല് ഇന്ത്യയില് നടക്കുന്ന ട്വന്റി20 ക്രിക്കറ്റ് ലോകകപ്പില് കളിക്കില്ലെന്നു പ്രഖ്യാപിച്ച ബംഗ്ലദേശിനെ ടൂര്ണമെന്റില്നിന്നും പുറത്താക്കിയിരുന്നു. പകരം സ്കോട്ലന്ഡിന് അവസരം നല്കിയതായി രാജ്യാന്തര ക്രിക്കറ്റ് കൗണ്സില് (ഐസിസി) പ്രഖ്യാപിച്ചു. തങ്ങളുടെ മത്സരങ്ങള് ശ്രീലങ്കയിലേക്കു മാറ്റണമെന്ന ബംഗ്ലദേശിന്റെ ആവശ്യം വോട്ടിനിട്ടു തള്ളിയ ഐസിസി, ഇന്ത്യയില് സുരക്ഷാ പ്രശ്നങ്ങളില്ലെന്ന് ആവര്ത്തിച്ചു. ബംഗ്ലദേശിലെ രാഷ്ട്രീയ പ്രതിസന്ധിയെ തുടര്ന്ന് ഇന്ത്യയുമായുണ്ടായ നീരസത്തിന്റെ തുടര്ച്ചയാണ് ഈ സംഭവവും.
ഇരു രാജ്യങ്ങളും തമ്മിലുള്ള നയതന്ത്ര തര്ക്കങ്ങളുടെ തുടര്ച്ചയായി ബംഗ്ലദേശ് പേസര് മുസ്തഫിസുര് റഹ്മാനെ ജനുവരി മൂന്നിന് ഐപിഎലില്നിന്ന് പുറത്താക്കിയതോടെയാണ് ഇരുരാജ്യങ്ങളും തമ്മിലുള്ള ക്രിക്കറ്റ് ബന്ധം വഷളായത്.
