ഇന്ത്യൻ ബഹിരാകാശ സഞ്ചാരി ശുംഭാംശു ശുക്ല ഉൾപെടുന്ന ആക്സിയം 4 ബഹിരാകാശ ദൗത്യം പൂർത്തിയായി. 14 ദിവസത്തെ ദൗത്യത്തിനാണ് ആക്സിയം 4 സംഘം അന്താരാഷ്ട്ര ബഹിരാകാശ നിലയത്തിലെത്തിയത്. സ്പേസ് എക്സിന്റെ ഡ്രാഗൺ ക്രൂ പേടകത്തിൽ ജൂൺ 26 നാണ് സംഘം നിലയത്തിലെത്തിയത്.
ജൂലായ് 9 ന് 14 ദിവസം പൂർത്തിയായി. എന്നാൽ ആക്സിയം 4 ദൗത്യ സംഘം ഭൂമിയിലേക്ക് തിരിക്കാൻ ജൂലായ് 14 വരെയെങ്കിലും കാത്തിരിക്കേണ്ടി വരുമെന്നാണ് യൂറോപ്യൻ സ്പേസ് ഏജൻസി നൽകുന്ന സൂചന. അതായത് നേരത്തെ തീരുമാനിച്ചതിൽ കൂടുതൽ ദിവസം ദൗത്യ സംഘം ബഹിരാകാശ നിലയത്തിൽ തുടരേണ്ടി വരും.
എന്നാൽ ഇക്കാര്യത്തിൽ ഐഎസ്ആർഒയുടെ ഭാഗത്ത് നിന്ന് പരസ്യമായ സ്ഥിരീകരണം വന്നിട്ടില്ല. ഇവർ എന്ന് തിരിച്ചുവരുന്ന തീയ്യതിയും ഏജൻസി വ്യക്തമാക്കിയിട്ടില്ല.
നിലയത്തിലെത്തിയതിന് പിന്നാലെ ശുഭാംശു ശുക്ല ഉൾപ്പടെയുള്ളവർ വിവിധ ശാസ്ത്ര പരീക്ഷണ ദൗത്യങ്ങൾ ആരംഭിച്ചിരുന്നു. മിഷൻ കമാൻഡർ പെഗ്ഗി വിറ്റ്സൺ, ഗ്രൂപ്പ് കാപ്റ്റൻ ശുഭാംശു ശുക്ല, മിഷൻ സ്പെഷ്യലിസ്റ്റുകളായ സ്ലാവോസ് ഉസ്നാൻസ്കി-വിസ്നിയേവ്സ്കി, ടൈബോർ കാപു എന്നിവരാണ് ദൗത്യ സംഘത്തിലുള്ളത്.
