തിരുവനന്തപുരം / കൊച്ചി: ∙ ചാരവൃത്തി കേസിൽ അറസ്റ്റിലായ യുട്യൂബ് വ്ലോഗർ ജ്യോതി മൽഹോത്ര കേരളത്തെപ്പറ്റി ആദ്യം ചെയ്ത വ്ലോഗ് 2023ൽ. വ്യത്യസ്ത സന്ദർഭങ്ങളിൽ കേരളം സന്ദർശിച്ചതിനെപ്പറ്റി ട്രാവൽ വിത്ത് ജോ എന്ന തന്റെ വ്ലോഗിലൂടെ വിഡിയോകൾ പങ്കുവച്ചിട്ടുണ്ട്. 2023 ഓഗസ്റ്റിൽ തിരുവനന്തപുരത്ത് എത്തി മടങ്ങിയ ജ്യോതി, പിറ്റേമാസം വീണ്ടുമെത്തി. കേരളത്തിന് അനുവദിച്ച രണ്ടാമത്തെ വന്ദേഭാരത് എക്സ്പ്രസിന്റെ ഉദ്ഘാടന യാത്രയിൽ പങ്കെടുക്കാനായിരുന്നു രണ്ടാം സന്ദർശനം. യാത്രയ്ക്കിടയിൽ അന്നു കേന്ദ്രമന്ത്രിയായിരുന്ന വി.മുരളീധരൻ ഉൾപ്പെടെയുള്ളവരുടെ അഭിപ്രായങ്ങൾ തേടുകയും ചെയ്തു.
നേത്രാവതി എക്സ്പ്രസിൽ മുംബൈയിൽനിന്നു കാസർകോട്ട് എത്തിയ ജ്യോതി വന്ദേഭാരത് എക്സ്പ്രസിൽ തിരുവനന്തപുരത്തു വന്ന ശേഷം നേത്രാവതിയിൽ തന്നെ മടങ്ങി. കഴിഞ്ഞ ജനുവരിയിൽ ഒരാഴ്ചത്തെ സന്ദർശനത്തിന് ഡൽഹിയിൽനിന്നു ബെംഗളൂരു വഴി കണ്ണൂർ വിമാനത്താവളത്തിലെത്തി. ജനുവരി 25 ന് തിരുവനന്തപുരത്തുനിന്നു രാജധാനി എക്സ്പ്രസിലാണ് ഡൽഹിയിലേക്കു മടങ്ങിയത്. ഇതിനിടെ, ജ്യോതി മൽഹോത്ര കേരളം സന്ദർശിച്ചതായുള്ള വിവരം സ്ഥിരീകരിക്കാൻ കേന്ദ്ര ഏജൻസികൾ അന്വേഷണം തുടങ്ങി. 2023 ഡിസംബറിലും ജ്യോതി കൊച്ചിയടക്കം സന്ദർശിച്ചതായുള്ള വിവരം ഏജൻസികൾക്കു ലഭിച്ചിട്ടുണ്ട്. എന്നാൽ, ഈ യാത്രയുമായി ബന്ധപ്പെട്ട ഒരു വിവരവും ജ്യോതി സമൂഹമാധ്യമങ്ങളിൽ പോസ്റ്റ് ചെയ്തിട്ടില്ല.