ആണ്‍കുട്ടികളുടെ ഹോസ്റ്റലില്‍ പെണ്‍സുഹൃത്തിനെ പെട്ടിയിലാക്കി എത്തിക്കാന്‍ ശ്രമിച്ച വിദ്യാര്‍ത്ഥിയെ കയ്യോടെ പിടികൂടി ഹോസ്റ്റല്‍ അധികൃതര്‍. ഹരിയാനയിലെ ഒപി ജിന്‍ഡാല്‍ ഗ്ലോബല്‍ യൂണിവേഴ്‌സിറ്റി വിദ്യാര്‍ത്ഥികളുടെ ഹോസ്റ്റലിലാണ് സംഭവം. പെണ്‍കുട്ടിയെ ട്രോളി ബാഗിനുള്ളില്‍ നിന്ന് പുറത്ത് എടുക്കുന്നതിന്റെ ദൃശ്യങ്ങള്‍ ഇതിനോടകം തന്നെ സോഷ്യല്‍ മീഡിയയില്‍ വൈറലായിട്ടുണ്ട്. വനിത അധികൃതരെത്തിയാണ് പെണ്‍കുട്ടിയെ പെട്ടിയില്‍ നിന്ന് പുറത്തെടുക്കുന്നത്.
കുട്ടികളുടെ കുസൃതി എന്നാണ് സംഭവത്തെ പറ്റി ഒപി ജിന്‍ഡാല്‍ ഗ്ലോബല്‍ യൂണിവേഴ്‌സിറ്റിയിലെ പിആര്‍ഒ പ്രതികരിച്ചത്. തങ്ങളുടെ സുരക്ഷാ സംവിധാനങ്ങള്‍ കര്‍ശനമായതിനാല്‍ വിദ്യാര്‍ത്ഥികള്‍ പിടിക്കപ്പെട്ടു. ഇത് വലിയ കാര്യമല്ല. തങ്ങളുടെ സുരക്ഷ എല്ലായ്‌പോഴും കര്‍ശനമാണ്. ഈ വിഷയത്തില്‍ ആരും ഒരു തരത്തിലുള്ള പരാതിയും നല്‍കിയിട്ടില്ലെന്നും പിആര്‍ഒ വ്യക്തമാക്കി. വിഷയത്തില്‍ ഏതെങ്കിലും തരത്തിലുള്ള അച്ചടക്ക നടപടി സര്‍വകലാശാല സ്വീകരിച്ചിട്ടുണ്ടോ എന്ന് വ്യക്തമല്ല.
