തിരുവനന്തപുരം: കേരള കൗൺസിൽ ഓഫ് ചർച്ചസ് (കെ.സി.സി) യൂത്ത് കമ്മീഷൻ സൗത്ത് റീജിയൻ കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച ‘തിയോഫനി 2025’ ക്രിസ്തുമസ് കാരൾ മത്സരം പേരൂർക്കട കാൽവറി ലൂഥറൻ ചർച്ചിൽ നടന്നു. ദക്ഷിണ കേരളത്തിലെ വിവിധ സഭകളിൽ നിന്നുള്ള യുവജനങ്ങളുടെ പങ്കാളിത്തം കൊണ്ട് ശ്രദ്ധേയമായ പരിപാടി, സഭകൾ തമ്മിലുള്ള ഐക്യത്തിന്റെയും കൂട്ടായ്മയുടെയും വേദി കൂടിയായി മാറി.
സോൾ വിന്നിംഗ് ചർച്ച് ഓഫ് ഇന്ത്യ ബിഷപ്പ് റൈറ്റ് റവ. ഡോ. ഓസ്റ്റിൻ എം.എ. പോൾ ഉദ്ഘാടനം ചെയ്തു.കെ സി സി വട്ടിയൂർകാവ് അസംബ്ലി പ്രസിഡൻ്റ് റവ. ഫാ. സാം കാഞ്ഞിക്കൽ കോർ എപ്പിസ്കോപ്പ അധ്യക്ഷത വഹിച്ചു.
കെ.സി.സി തിരുവനന്തപുരം ജില്ലാ പ്രസിഡന്റ് റവ. എ.ആർ. നോബിൾ, കാൽവറി ലൂഥറൻ ചർച്ച് വികാരി റവ. ജെ.എച്ച്. പ്രമോദ് എന്നിവർ ആശംസകൾ അർപ്പിച്ചു .
ആവേശകരമായ മത്സരത്തിൽ കാൽവറി ലൂഥറൻ യൂത്ത് ക്വയർ ഒന്നാം സ്ഥാനവും മുത്തൂറ്റ് ഫിൻകോർപ്പ് സ്പോൺസർ ചെയ്ത 10,001 രൂപയും മെമെന്റോയും നേടി. കെ.സി.സി വട്ടിയൂർക്കാവ് അസംബ്ലി യൂത്ത് ക്വയർ ടീം 7001 രൂപ ക്യാഷ് പ്രൈസോടെ രണ്ടാം സ്ഥാനം കരസ്ഥമാക്കി. മെട്രോ സ്കാൻസ് ആൻഡ് ലബോറട്ടറി സ്പോൺസർ ചെയ്ത 5001 രൂപയും മെമെന്റോയും നേടി വിന്നേഴ്സ് ഫോർ ജീസസ് ക്വയർ ഗ്രൂപ്പ് മൂന്നാം സ്ഥാനത്തെത്തി. വിജയികൾക്ക് അതിഥികൾ സമ്മാനങ്ങൾ വിതരണം ചെയ്തു.
കെ.സി.സി യൂത്ത് കമ്മീഷൻ സൗത്ത് റീജിയൻ ചെയർപേഴ്സൺ അഡ്വ. ആൽബി അന്ന എബി സ്വാഗതവും,കെ.സി.സി വട്ടിയൂർക്കാവ് അസംബ്ലി സെക്രട്ടറി അശ്വിൻ ഇ. ഹാംലെറ്റ് നന്ദിയും പറഞ്ഞു.
