കൊല്ലം: കൊട്ടാരക്കരയിൽ കിണറ്റിൽ ചാടിയ യുവതിയെ രക്ഷിക്കാൻ ശ്രമിക്കുന്നതിനിടെ അപകടത്തിൽപ്പെട്ട് ഫയർഫോഴ്സ് ഉദ്യോഗസ്ഥൻ ഉൾപ്പെടെ മൂന്ന് പേർ മരിച്ചു. കൊട്ടാരക്കര ആനക്കോട്ടൂർ മുണ്ടുപാറയിലാണ് നാടിനെ നടുക്കിയ സംഭവം. കിണറ്റിൽ ചാടിയ അർച്ചന (33), ഇവരെ രക്ഷിക്കാൻ ശ്രമിക്കുന്നതിനിടെ അപകടത്തിൽപ്പെട്ട സുഹൃത്ത് ശിവ കൃഷ്ണൻ (23), ഫയർമാൻ സോണി എസ്. കുമാർ (38) എന്നിവരാണ് മരിച്ചത്.
സംഭവമിങ്ങനെ: ഇന്നലെ വൈകുന്നേരം അർച്ചന കിണറ്റിൽ ചാടുകയായിരുന്നു. ഇവരെ രക്ഷിക്കാനുള്ള ശ്രമത്തിനിടെയാണ് ദാരുണമായ അപകടം സംഭവിച്ചത്. അർച്ചനയെ കിണറ്റിൽ നിന്ന് പുറത്തെടുക്കുന്നതിനിടെ കിണറിൻ്റെ കൈവരി ഇടിഞ്ഞ് ഫയർമാൻ സോണി എസ്. കുമാറിൻ്റെ ദേഹത്തേക്ക് വീഴുകയായിരുന്നു. ഈ സമയം കരയ്ക്ക് നിന്ന അർച്ചനയുടെ സുഹൃത്ത് ശിവ കൃഷ്ണനും കിണറ്റിലേക്ക് വീണു.
നാല് മണിക്കൂർ നീണ്ട പരിശ്രമത്തിനൊടുവിലാണ് മൂന്ന് പേരുടെയും മൃതദേഹങ്ങൾ പുറത്തെടുക്കാൻ രക്ഷാപ്രവർത്തകർക്ക് സാധിച്ചത്.
യുവതിയും സുഹൃത്തും തമ്മിലുണ്ടായ തർക്കമാണ് ദുരന്തത്തിലേക്ക് നയിച്ചതെന്നാണ് നാട്ടുകാർ പറയുന്നത്. വീട്ടിലിരുന്ന് ശിവ കൃഷ്ണനും സുഹൃത്തുക്കളും മദ്യപിച്ചത് അർച്ചന ചോദ്യം ചെയ്തതിനെ തുടർന്നുണ്ടായ തർക്കമാണ് യുവതി ജീവനൊടുക്കാൻ ശ്രമിക്കുന്നതിൽ കലാശിച്ചതെന്നും റിപ്പോർട്ടുകൾ സൂചിപ്പിക്കുന്നു.
മരിച്ച ഫയർമാൻ സോണി എസ്. കുമാറിൻ്റെ മൃതദേഹം പോസ്റ്റ്മോർട്ടത്തിന് ശേഷം ഉച്ചയോടെ കൊട്ടാരക്കര ഫയർ സ്റ്റേഷനിൽ പൊതുദർശനത്തിന് വെക്കും.
#കൊല്ലം #കൊട്ടാരക്കര #ദുരന്തം #അപകടം #ഫയർഫോഴ്സ് #രക്ഷാപ്രവർത്തനം #ഫയർമാൻ #മരണം #Kollam #Kottarakkara #Tragedy #Fireman #KeralaNews #RIP
