കൊല്ലം: പുറ്റിംഗല്‍ ക്ഷേത്രത്തിലെ വെടിക്കെട്ട് ദുരന്തവുമായി ബന്ധപ്പെട്ട കേസിലെ 30-ാം പ്രതി അടൂര്‍ ഏറം സ്വദേശി അനുരാജിനെ കോടതി പിടികിട്ടാപ്പുള്ളിയായി പ്രഖ്യാപിച്ചു.
പ്രത്യേക കോടതിയുടെ ചുമതലയുള്ള നാലാം അഡീഷണല്‍ ഡിസ്ട്രിക്ട് ആന്റ് സെഷന്‍സ് ജഡ്ജി എസ്. സുഭാഷാണ് പ്രതിയെ പിടികിട്ടാപ്പുള്ളിയായി പ്രഖ്യാപിച്ചത്.
ഇനി ഇയാളെ ഒഴിവാക്കിയായിരിക്കും കേസിന്റെ വിചാരണ നടപടികള്‍ ആരംഭിക്കുക. നിരവധി തുടര്‍ നടപടികള്‍ക്ക് ശേഷമാണ് കോടതി ഇന്നലെ അനുരാജിനെ പിടികിട്ടാപ്പുള്ളിയായി പ്രഖ്യാപിച്ചത്.
അറസ്റ്റിലായി ജാമ്യം ലഭിച്ച ശേഷം ഒളിവില്‍ പോയ പ്രതിയെ വാറണ്ടില്‍ പിടിക്കുന്നതിന് നിര്‍വാഹമില്ലെന്ന് പോലീസ് കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു. പിടികിട്ടാപ്പുള്ളിയായി പ്രഖ്യാപിക്കുന്നതിന് മുന്നോടിയായി അടൂര്‍ ഏറം പഞ്ചായത്തിലെ പ്രതിയുടെ വീട്ടില്‍ പോലീസ് നോട്ടീസ് പതിക്കുകയുണ്ടായി. അറസ്റ്റ് ഭയന്ന് രണ്ട് വര്‍ഷം മുമ്പ് നാടുവിട്ട് പോയതാണെന്നുള്ള ബന്ധുക്കളും നാട്ടുകാരും നല്‍കിയ വിവരങ്ങളും പോലീസ് കോടതിയെ ധരിപ്പിച്ചു.
ഇത് കൂടാതെ പ്രതിയെ വാറണ്ടില്‍ കിട്ടാത്ത വിവരം പോലീസ് ചൂരക്കോട് പഞ്ചായത്ത് വായനശാലയുടെ നോട്ടീസ് ബോര്‍ഡിലും ഏറം പഞ്ചായത്ത് ഓഫീസ് നോട്ടീസ് ബോര്‍ഡിലും പതിക്കുകയുണ്ടായി.
പോലീസിന്റെ അപേക്ഷ പ്രകാരം പ്രതിയുടെ പേരില്‍ സ്ഥാവര ജംഗമ സ്വത്തുക്കള്‍ ഒന്നുമില്ലെന്ന് പത്തനംതിട്ട ജില്ലാ കളക്ടറും വില്ലേജ് ഓഫീസറും റിപ്പോര്‍ട്ട് നല്‍കുകയുമുണ്ടായി. ഇക്കാര്യങ്ങളെല്ലാം വിശദമാക്കി അന്വേഷണ ഉദ്യോഗസ്ഥന്‍ കോടതിയില്‍ റിപ്പോര്‍ട്ടും സത്യവാങ്മൂലവും ഫയല്‍ ചെയ്തു. തുടര്‍ന്നാണ് പ്രതിയെ ഇന്നലെ പിടികിട്ടാപ്പുള്ളിയായി പ്രഖ്യാപിച്ച് ജഡ്ജി ഉത്തരവായത്.
കേസില്‍ ആകെ 59 പ്രതികളാണുള്ളത്. ഇതില്‍ 13 പേര്‍ മരിച്ചു. 28 പ്രതികള്‍ ഇന്നലെ ഹാജരായി. 17 പ്രതികള്‍ അവധിക്ക് അപേക്ഷ നല്‍കി. 32-ാം പ്രതി ഹാരിസിനെതിരെ കോടതി വാറണ്ടും പുറപ്പെടുവിച്ചു.
പിടി കിട്ടാപ്പുള്ളിയായി പ്രഖ്യാപിക്കപ്പെട്ട 30-ാം പ്രതിയുടെ ജാമ്യക്കാരുടെ പിഴ തുക നിശ്ചയിക്കുന്നതിന് കേസ് മേയ് മൂന്നിന് പരിഗണിക്കും. 30-ാം പ്രതിക്കെതിരായ ജപ്തി പ്രഖ്യാപിച്ച് മറ്റു നടപടികള്‍ക്കായി കേസ് മേയ് ഏഴിനും മാറ്റി വച്ചിട്ടുണ്ട്. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ കെ.പി. ജബ്ബാര്‍, അഡ്വ.അമ്പിളി ജബ്ബാര്‍ എന്നിവര്‍ കോടതിയില്‍ ഹാജരായി.