കൊല്ലം: മദ്ധ്യവയസ്‌കനെ കുത്തിക്കൊലപ്പെടുത്താന്‍ ശ്രമിച്ചയാളെ പോലീസ് അറസ്റ്റ് ചെയ്തു. കടയ്ക്കാവൂര്‍ നിലയ്ക്കമുക്ക് കോണത്തുവിള വീട്ടില്‍ വിഷ്ണു (27) ആണ് ചാത്തന്നൂര്‍ പോലീസിന്റെ പിടിയിലായത്. മൈലക്കാട് സുനൈദ മന്‍സിലില്‍ സലാഹുദ്ദീനെയാണ് ഇയാള്‍ കുത്തി കൊലപ്പെടുത്താന്‍ ശ്രമിച്ചത്. കഴിഞ്ഞ ഞായറാഴ്ച രാത്രി വിഷ്ണുവും സലാഹുദ്ദീനും തമ്മില്‍ വാക്കുതര്‍ക്കം ഉണ്ടാവുകയും പ്രതിയായ വിഷ്ണു കത്തി ഉപയോഗിച്ച് സലാഹുദ്ദീനെ കുത്തിക്കൊലപ്പെടുത്താന്‍ ശ്രമിക്കുകയുമായിരുന്നു.
കടയ്ക്കാവൂര്‍ സ്വദേശിയായ ഇയാള്‍ കടയ്ക്കാവൂര്‍, ചിറയിന്‍കീഴ് എന്നീ പോലീസ് സ്റ്റേഷനുകളില്‍ മോഷണം, പിടിച്ചുപറി, കൊലപാതകശ്രമം തുടങ്ങിയ വകുപ്പുകള്‍ പ്രകാരം രജിസ്റ്റര്‍ ചെയ്യ്തിട്ടുള്ള കേസുകളില്‍ പ്രതിയാണ്. 2024ല്‍ കാപ്പാ നിയമപ്രകാരം കരുതല്‍ തടങ്കലിലായിരുന്ന ഇയാള്‍ ജയില്‍ മോചിതനായ ശേഷം ചാത്തന്നൂരും പരിസരത്തും വാടകയ്ക്ക് താമസിച്ചു വരികയായിരുന്നു.
