പാലക്കാട്: തിരഞ്ഞെടുപ്പ് പത്രിക സമർപ്പിക്കാൻ തയ്യാറെടുക്കുന്നതിനിടെ യുഡിഎഫ് സ്ഥാനാർത്ഥിയും നടനുമായ രമേശ് പിഷാരടിയ്ക്ക് ആശംസകളുമായി മെഗാസ്റ്റാർ മമ്മൂട്ടി. വീഡിയോ കോളിലൂടെയാണ് മമ്മൂട്ടി പിഷാരടിക്ക് ആശംസകൾ അറിയിച്ചത്. പ്രചാരണ പരിപാടികൾക്കിടെ അപ്രതീക്ഷിതമായി എത്തിയ മമ്മൂട്ടിയുടെ കോൾ പ്രവർത്തകരിലും വൻ ആവേശമാണ് ഉണ്ടാക്കിയത്.
നാമനിർദേശ പത്രിക സമർപ്പിക്കും മുൻപ് ലഭിച്ച ഈ പിന്തുണ പിഷാരടിക്കും യുഡിഎഫിനും വലിയ ഊർജ്ജമായി. നാമനിർദേശ പത്രിക സമർപ്പിക്കാൻ എത്തിയ രമേശ് പിഷാരടിയെ ഷാഫി പറമ്പിലിൽ ഷാൾ അണിയിച്ചു സ്വീകരിച്ചു. പ്രവർത്തകർക്കിടയിൽ സന്തോഷം പങ്കുവച്ചുനിൽക്കുമ്പോഴാണ് മമ്മൂട്ടിയുടെ കോൾ വരുന്നത്.
ഉടൻ തന്നെ ഫോൺ ഉയർത്തിപ്പിടിച്ച് പിഷാരടി തനിക്ക് ചുറ്റുമുള്ള വൻ ജനക്കൂട്ടത്തെ മമ്മൂട്ടിക്ക് കാണിച്ചുകൊടുത്തു. ഫോൺ സ്ക്രീനിൽ മമ്മൂട്ടിയെ കണ്ടതോടെ പ്രവർത്തകർ ആവേശത്തോടെ ആർപ്പുവിളിക്കുകയും കെെവീശി കാണിക്കുകയും ചെയ്യുന്നു. മമ്മൂട്ടിയും കെെ വീശുന്നുണ്ട്. ഇതിന്റെ വീഡിയോ സോഷ്യൽ മീഡിയയിൽ വെെറലാണ്.
