കൊല്ലം: മുഖ്യമന്ത്രി പിണറായി വിജയനെ ചാനല് ചര്ച്ചയില് വിമര്ശിച്ചതിനെത്തുടര്ന്ന് സിപിഎം വിലക്ക് നേരിട്ട ഇടത് നിരീക്ഷകന് ബി.എന് ഹസ്കര് സിപിഎം വിട്ടു. ആര്എസ്പിയില് ചേരുമെന്ന് അദ്ദേഹം പറഞ്ഞു. രക്തസാക്ഷി ഫണ്ട് പോലും വെട്ടിക്കുന്ന പാര്ട്ടിയായി സിപിഎം മാറി. ജീര്ണതയുടെ പടുക്കുഴിയിലാണ് പാര്ട്ടിയെന്നും അദ്ദേഹം പറഞ്ഞു.
എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനെ മുഖ്യമന്ത്രി ഔദ്യോഗിക കാറില് കയറ്റിയതിനെയാണ് ചാനല് ചര്ച്ചയില് ഹസ്കര് വിമര്ശിച്ചത്. പിണറായി വിജയന് ചെയ്ത തെറ്റിനെ ഇപ്പോഴും ന്യായീകരിക്കുന്നത് തിരുത്താന് പാര്ട്ടിക്ക് കഴിയാതെപോയത് കാപട്യമാണെന്നും വിമര്ശിച്ചു. തുടര്ന്ന് സി.പി.എം. ജില്ലാ കോടതി അഭിഭാഷക ബ്രാഞ്ച് യോഗത്തിലേക്ക് വിളിച്ചു വരുത്തി ഹസ്ക്കറിനെ ശാസിച്ചത്.
സിപിഎം സംസ്ഥാന കമ്മിറ്റി അംഗം കെ. സോമപ്രസാദ് ഹസ്കറിനെ വിളിച്ചുവരുത്തി ഇടത് നിരീക്ഷകന് എന്നപേരില് ചാനല് ചര്ച്ചയില് പങ്കെടുക്കരുതെന്ന് താക്കീത് ചെയ്യുകയായിരുന്നു. തുടര്ന്ന്, ‘ഇടത് നിരീക്ഷകന്’ എന്ന സ്ഥാനം ഔദ്യോഗികമായി ഒഴിഞ്ഞെന്നും സുരക്ഷയ്ക്കായി പാര്ട്ടി നല്കിയിരുന്ന ‘ഗണ്മാനെ’ തിരിച്ചേല്പ്പിച്ചെന്നും ഹസ്കര് മാധ്യമങ്ങളിലൂടെ പറഞ്ഞു. ശാസനകേട്ടതോടെ താന് വല്ലാതെ ‘പേടിച്ചുപോയെന്ന് എല്ലാവരോടും പറഞ്ഞേക്കണമെന്നും അദ്ദേഹം പരിഹസിച്ചു.
