വയനാട്. ആയുധധാരികളായ സംഘം രാത്രി വാഹനം തടഞ്ഞു നിര്ത്തി ഭീകരാന്തരീക്ഷം സൃഷ്ടിച്ച് യാത്രക്കാരെ മര്ദിച്ചശേഷം വാഹനവും മുതലുകളും കവര്ച്ച ചെയ്തുകൊണ്ടുപോയ സംഭവത്തില് സഹായി പിടിയില്. കഴിഞ്ഞ നാലിന് രാത്രിയാണ് സംഭവം. കോഴിക്കോട് സ്വദേശിയും ഡ്രൈവറും ബിസിനസ് ആവശ്യത്തിനായി ബാംഗ്ളൂരില് പോയി തിരിച്ചു വരവെ അക്രമി സംഘം പിന്തുടർന്ന് ആക്രമിക്കുകയായിരുന്നു
കുറ്റവാളി സംഘത്തെ സഹായിച്ച പാടിച്ചിറ, സീതാമൗണ്ട്, പുതുച്ചിറ വീട്ടില് രാജനെയാണ് ബത്തേരി പോലീസ് പിടികൂടിയത്. വാഹനം കവര്ച്ച ചെയ്തു കൊണ്ടുവരുന്നതിനും പൊളിക്കുന്നതിനും തെളിവ് നശിപ്പിക്കുന്നതിനും പ്രതികളെ ഒളിപ്പിക്കുന്നതിനും വേണ്ട സഹായമാണ് ഇയാള് ചെയ്തു നല്കിയത്.
പൊളിച്ച് ഉപേക്ഷിച്ച വാഹനത്തിന്റെ ഡാഷ് ബോര്ഡില് നിന്ന് ലഭിച്ച തെളിവുകളുടെ അടിസ്ഥാനത്തിലാണ് പോലീസ് ഇയാളെ വലയിലാക്കിയത്. ഹൈവേയില് യാത്ര ചെയ്യുന്ന വാഹനങ്ങള് തടഞ്ഞ്് പണവും സ്വര്ണവും വിലയേറിയ മുതലുകളും മോഷ്ടിക്കണമെന്ന ഉദ്ദേശ്യത്തോടെ മാരാകായുധങ്ങളുമായെത്തിയ സംഘമാണ് അക്രമം നടത്തിയത്.
