തിരുവനന്തപുരം.ഡോക്ടറുടെ കുറിപ്പടി ഇല്ലാതെ 12 വയസിന് താഴെയുള്ള കുട്ടികള്ക്ക് മരുന്ന് നല്കരുതെന്ന് ആരോഗ്യമന്ത്രി വീണാ ജോര്ജ്. ഡോക്ടറുടെ പഴയ കുറിപ്പടി വച്ചും കുട്ടികള്ക്കുള്ള മരുന്ന് നല്കരുത്.ചുമ മരുന്നുകളുടെ ഉപയോഗത്തിൽ, കേരളം പ്രത്യേകം മാര്ഗരേഖ പുറത്തിറക്കും. ഇതിനായി മൂന്നംഗ വിദഗ്ധ സമിതി രൂപീകരിച്ചു. മന്ത്രി വീണാ ജോര്ജിന്റെ നേതൃത്വത്തില് ചേർന്ന ഉന്നതതല യോഗത്തിലാണ് തീരുമാനം.
ഉത്തരേന്ത്യയിൽ കഫ് സിറപ്പ് കഴിച്ച് കുട്ടികൾ മരിക്കാൻ ഇടയായ സംഭവത്തിൻറെ പശ്ചാത്തലത്തിൽ സംസ്ഥാനത്തും ജാഗ്രത.
കഫ് സിറപ്പുമായി ബന്ധപ്പെട്ട് കുട്ടികള്ക്ക് ഒരു പ്രശ്നവും കേരളത്തില് റിപ്പോര്ട്ട് ചെയ്തിട്ടില്ലെന്ന് മന്ത്രി വീണാ ജോര്ജിന്റെ നേതൃത്വത്തില് ചേർന്ന ഉന്നതതല യോഗത്തിൽ ഡോക്ടര്മാര് അറിയിച്ചു.
കുട്ടികളുടെ ചുമ മരുന്നുകളുടെ ഉപയോഗം സംബന്ധിച്ച് സംസ്ഥാനം പ്രത്യേകം മാര്ഗരേഖ പുറത്തിറക്കും.ഇതുമായി ബന്ധപ്പെട്ട പഠനം നടത്തി അടിയന്തരമായി റിപ്പോര്ട്ട് സമര്പ്പിക്കാന് മൂന്നംഗ വിദഗ്ധ സമിതി രൂപീകരിച്ചു.സംസ്ഥാന ഡ്രഗ്സ് കണ്ട്രോളര്, ചൈല്ഡ് ഹെല്ത്ത് നോഡല് ഓഫീസര്, ഐഎപി സംസ്ഥാന പ്രസിഡന്റ് എന്നിവരാണ് സമിതിയിലുള്ളത്. അംഗീകൃത ഡോക്ടറുടെ കുറിപ്പടി ഇല്ലാതെ 12 വയസിന് താഴെയുള്ള കുട്ടികള്ക്ക് വേണ്ടി മരുന്ന് നല്കരുതെന്ന് മന്ത്രി വീണാ ജോർജ് നിർദ്ദേശിച്ചു. ഡോക്ടറുടെ പഴയ കുറിപ്പടി വച്ചും കുട്ടികള്ക്കുള്ള മരുന്ന് നല്കരുത്. കുട്ടികള്ക്കുള്ള മരുന്നുകള് അവരുടെ തൂക്കത്തിനനുസരിച്ചാണ് ഡോക്ടര്മാര് ഡോസ് നിശ്ചയിക്കുന്നത്. അതിനാല് ഒരു കുഞ്ഞിന് കുറിച്ച് നല്കിയ മരുന്ന് മറ്റ് കുഞ്ഞുങ്ങള്ക്ക് നല്കാന് പാടില്ല. ജനങ്ങള്ക്കിടയില് അവബോധം സൃഷ്ടിക്കുന്നതിനും ആശങ്ക പരിഹരിക്കാനും ശക്തമായ ബോധവത്ക്കരണം നടത്തും. ഇതുമായി ബന്ധപ്പെട്ട് കേസുകള് ഉണ്ടോയെന്ന് പ്രത്യേകം പരിശോധിക്കാനും മന്ത്രി നിര്ദേശം നല്കി.
