കൊച്ചി.കെ ജെ ഷൈന്റെ സൈബർ ആക്രമണ പരാതിയിൽ പ്രാദേശിക കോൺഗ്രസ് നേതാവ് ഗോപാലകൃഷ്ണന് നാളെ ഹാജരാകാൻ നോട്ടീസ് നൽകി പ്രത്യേക അന്വേഷണ സംഘം. കേസിൽ ഒന്നാം പ്രതിയായ ഗോപാലകൃഷ്ണന്റെ വീട്ടിൽ ഇന്ന് പൊലീസ് പരിശോധന നടത്തിയിരുന്നു. തുടർന്നാണ് ഹാജരാകാൻ നോട്ടീസ് നൽകിയത്.
പരിശോധനയിൽ ഗോപാലകൃഷ്ണന്റെ മൊബൈൽ ഫോൺ പോലീസ് കസ്റ്റഡിയിലെടുത്തു. കേസിൽ ഒരാളെ കൂടി പ്രതിചേർത്തു.
ഇന്ന് ഉച്ചയോടെയാണ് ഗോപാലകൃഷ്ണന്റെ പറവൂരിലെ വീട്ടിൽ പ്രത്യേക അന്വേഷണസംഘം പരിശോധന നടത്തിയത്. വീട്ടിൽനിന്ന് ഗോപാലകൃഷ്ണന്റെ മൊബൈൽ ഫോൺ പോലീസ് കസ്റ്റഡിയിൽ എടുത്തിട്ടുണ്ട്. ഫോൺ പോലീസ് ഫോറൻസിക് പരിശോധനയ്ക്ക് അയക്കും. കേസിൽ ഒന്നാം പ്രതിയായ ഗോപാലകൃഷ്ണന് ചോദ്യം ചെയ്യലിന് ഹാജരാകാൻ നോട്ടീസ് നൽകി. നാളെ ഹാജരാകണം എന്നാണ് നിർദ്ദേശം.
അതെസമയം കേസിൽ കൊണ്ടോട്ടി അബു എന്ന പ്രൊഫൈൽ ഉള്ള യൂട്യൂബർ യാസിർ എന്നയാളെ കൂടി പ്രതി ചേർത്തു. കെ ജെ ഷൈന്റെയും ഉണ്ണികൃഷ്ണൻ എംഎൽഎയുടെ മൊഴി പോലീസ് നേരത്തെ തന്നെ രേഖപ്പെടുത്തിയിരുന്നു. കേസിൽ സാമൂഹ്യ മാധ്യമങ്ങളിലെ വിവരങ്ങൾക്കായി പോലീസ് മെറ്റക്ക് കത്ത് നൽകിയിട്ടുണ്ട്. ആ റിപ്പോർട്ടു കൂടി പരിഗണിച്ചാകും തുടരന്വേഷണം.
