ഹൃദയപൂർവ്വം സിനിമ നന്നായി പഠിക്കാതെ എടുത്ത സിനിമയെന്നും, അവയവ ദാന മേഖലക്ക് വലിയ ദോഷം വരുത്തുന്നതെന്നും ഡോ. ഹാരിസ്, ജോസഫ് എന്ന സിനിമ മസ്തിഷ്കമരണം മൂലമുള്ള അവയവദാനത്തിന് വലിയ ദോഷം ചെയ്തതാണ് എന്നും അദ്ദേഹം ചൂണ്ടിക്കാട്ടുന്നു. ഫേസ്ബുക്കിലൂടെയാണ് ജനകീയനെന്ന് പേരെടുത്ത മികവുറ്റ ഡോക്ടറുടെ വിമർശനം
ഹൃദയപൂർവം എന്ന സിനിമ കണ്ടു. ഒരു കാര്യവും നന്നായി പഠിക്കുകയോ മനസിലാക്കുകയോ ചെയ്യാതെയാണ് മിക്ക മലയാളം സിനിമകളും ഇത്തരം വിഷയങ്ങള് കൈകാര്യം ചെയ്യുന്നത്.
ജോസഫ് എന്ന സിനിമ മസ്തിഷ്ക്ക മരണ അവയവ ദാനത്തിന് ഏല്പ്പിച്ച പ്രഹരം മാരകമായിരുന്നു. തലയില് ചുറ്റിക കൊണ്ട് അടിച്ച് ബ്രെയിൻ ഡെത്ത് അവസ്ഥയില് എത്തിക്കുമത്രെ. വിദൂര സാധ്യതപോലും ഇല്ലാത്ത ആരോപണം. ഹൃദയപൂർവത്തില് ഇത്ര സീനിയറായ ഒരു സംവിധായകൻ എത്ര അലക്ഷ്യമായിട്ടാണ് ഈ വിഷയം കൈകാര്യം ചെയ്യുന്നത്.
അവയവം മാറ്റിവച്ച വ്യക്തി എടുക്കേണ്ട കരുതലുകള് ഒന്നും ചിത്രം കാണിക്കുന്നില്ല. ഒക്കെ വെറും തമാശ. അവയവം ദാനം ചെയ്ത വ്യക്തിയോടും കുടുംബത്തോടും ഒരൊറ്റ വികാരമാണ് ദാനം സ്വീകരിച്ചവർക്കും അവരുടെ ബന്ധുക്കള്ക്കും പൊതുസമൂഹത്തിനും ഉണ്ടാകാൻ പാടുള്ളു, ബഹുമാനം, ആദരം!
ആകസ്മികമായി ഒരു വ്യക്തി അപകടത്തിലോ മറ്റ് കാരണങ്ങള് കൊണ്ടോ, ബ്രെയിൻ ഡെത്ത് സ്റ്റേജില് പോകുന്നതും ആ വ്യക്തിയുടെ അവയവങ്ങള് ദാനം ചെയ്യാൻ ഉറ്റ ബന്ധുക്കള് തീരുമാനിക്കുന്നതും തുടർന്ന് നടക്കുന്ന ബൃഹത്തായ ടീം വർക്കും. ഇവിടെ കോമഡിക്ക് സ്ഥാനമില്ല.
ഇനി അവയവം സ്വീകരിച്ച വ്യക്തി ഒരുപാട് നിയന്ത്രണങ്ങള് അവർക്ക് ആവശ്യമുണ്ട്. അവയവത്തെ തിരസ്കരിക്കാൻ ശരീരം നിരന്തരം ശ്രമിച്ചുകൊണ്ടേയിരിക്കും. എത്ര കാലം കഴിഞ്ഞാലും ആ പ്രതിരോധത്തെ പ്രതിരോധിച്ച് തോല്പ്പിക്കാനാണ് മരുന്നുകള് തുടർച്ചയായി കഴിക്കേണ്ടിവരുന്നത്.
ശരീരത്തിന്റെ മൊത്തം പ്രതിരോധ ശക്തി (immunity) കുറയ്ക്കുന്ന അവസ്ഥയില് രോഗികള് കുറേ കാര്യങ്ങള് ശ്രദ്ധിക്കണം. ഇൻഫെക്ഷനുകളാണ് പ്രധാന വില്ലൻ. പല തരത്തിലുള്ള രോഗാണുബാധകള് ഉണ്ടാകാം. സീരിയസ് ആകാം. അവയവം തിരസ്കരിക്കപ്പെടാം. മരണം പോലും സംഭവിക്കാം. ഒരു കോംപ്ലിക്കേഷൻ വന്നു കഴിഞ്ഞാല് ഉണ്ടാകുന്ന സാമ്ബത്തിക ചിലവ് വളരെ ഉയർന്നതാകാം.
മാസ്ക് ഉപയോഗിക്കുക, ധാരാളം ജനക്കൂട്ടം ഉള്ള സ്ഥലങ്ങള് ഒഴിവാക്കുക, മൃഗങ്ങളുമായി (pet animals) അടുത്ത് ഇടപഴകാതിരിക്കുക. മൃഗങ്ങളില് നിന്ന് ടോക്സോപ്ലാസ്മ, പലതരം ഫംഗസുകള്, പരാദജീവികള് ഇത്തരം അസുഖങ്ങള് വളരെ മാരകമാകാം.
സ്റ്റിറോയ്ഡ് ഉള്പ്പെടെ മരുന്നുകള് കഴിക്കുന്നത് കൊണ്ട് എല്ലുകളുടെ ബലം കുറയാം. അതിനാല് അപകടങ്ങള്, അടിപിടി… ഇതൊക്കെ കഴിയുന്നതും ഒഴിവാക്കുക. ദാതാവും സ്വീകർത്താവും പൊതുവെ തമ്മില് അറിയരുത് എന്നൊരു ചിന്ത ഉണ്ടായിരുന്നു. പിന്നീടുണ്ടാകാവുന്ന കുറേ പ്രശ്നങ്ങള് ഒഴിവാക്കാനുള്ള ഒരു സമ്ബ്രദായം ആയിരുന്നു. ഇപ്പോള് മീഡിയയുടെ ശക്തമായ ഇടപെടല് മൂലം ആ രഹസ്യ സ്വഭാവം പാലിക്കപ്പെടുന്നില്ല.
ഹൃദയത്തില് കൂടി സ്വഭാവങ്ങള്, ശീലങ്ങള്, വികാരങ്ങള് ഇതൊക്കെ കൈമാറ്റം ചെയ്യുന്നു എന്നതൊക്കെ വെറും ബാലഭൂമി കഥകള് മാത്രം. വെറും പേശികളും അതിനെ നിയന്ത്രിക്കുന്ന നാഡികളും മാത്രമുള്ള ഒരു പമ്പ് മാത്രമാണ് ഹൃദയം.
അല്ലാതെ അതില് കൂടി വികാരം ഒന്നും മാറ്റിവയ്ക്കപ്പെടുന്നില്ല. സയൻസിനെ പോലും വളച്ചും ഒടിച്ചും വക്രീകരിച്ചും കാണിക്കുന്നതിലൂടെ നഷ്ടപ്പെടുന്നത് ജനങ്ങളുടെ ശാസ്ത്രാവബോധവും സിനിമയുടെ ക്രെഡിബിലിറ്റിയുമാണ്.
ഡോ: ഹാരിസ് ചിറക്കൽ
