താമരശ്ശേരി. ചുരത്തിലൂടെ ഒറ്റ ലെയിനായി ചെറുവാഹനങ്ങള് കടത്തിവിടും.ഈ ഇളവ് മഴ കുറയുന്ന സമയങ്ങളില് മാത്രം.ഭാരമേറിയ വാഹനങ്ങള് അനുവദിക്കില്ല.ചുരത്തിലെ കല്ലും മണ്ണും പൂര്ണമായും നീക്കി.മണ്ണിടിച്ചിലുണ്ടായ താമരശ്ശേരി ചുരം റോഡ് വഴി ഭാരം കുറഞ്ഞ വാഹനങ്ങള് ഒറ്റവരിയായി കടത്തിവിടാന് തീരുമാനം.ജില്ലാ കലക്ടര് സ്നേഹില്കുമാര് സിംഗിന്റെ അധ്യക്ഷതയില് ചേര്ന്ന ജില്ലാ ദുരന്ത നിവാരണ അതോറിറ്റിയുടേതാണ് തീരുമാനം.
മഴ ശക്തമായി പെയ്യുന്ന സമയങ്ങളില് വാഹന ഗതാഗതം അനുവദിക്കില്ല.മഴ കുറയുന്ന സമയത്ത് മാത്രമേ ഒറ്റലൈനായി വാഹനങ്ങളെ കടത്തിവിടും.റോഡിന്റെ താമരശ്ശേരി, വയനാട് ഭാഗങ്ങളില് ഇതിനായുള്ള ക്രമീകരണങ്ങള് വരുത്താനും ജില്ലാ കലക്ടര് നിര്ദ്ദേശം നല്കി.താമരശ്ശേരി ചുരം റോഡിലേക്ക് വീണ പാറക്കല്ലുകളും മണ്ണും പൂര്ണമായും നീക്കം ചെയ്തിട്ടുണ്ട്.
ശക്തമായ മഴ തുടരുന്ന സാഹചര്യത്തില് അടര്ന്നു നില്ക്കുന്ന പാറകള് ഇനിയും റോഡിലേക്ക് വീഴാന് സാധ്യതയുണ്ട്.ആയതിനാല് പ്രദേശത്ത് മുഴുവന് സമയ നിരീക്ഷണം ഏര്പ്പെടുത്തും.പ്രദേശത്ത് റോഡില് രാത്രികാലത്ത് ആവശ്യത്തിന് വെളിച്ചം ലഭ്യമാക്കുന്നതിനുള്ള സംവിധാനം ഫയര് ആന്റ് റെസ്ക്യൂ വിഭാഗവും തഹസില്ദാറും ഉറപ്പുവരുത്തണം.ആവശ്യത്തിന് ക്രെയിനുകള് ഉള്പ്പെടെയുള്ള സംവിധാനങ്ങളും സജ്ജമാക്കണം.ആംബുലന്സ് സര്വീസ് ഉറപ്പുവരുത്തുകയും പ്രദേശത്തെ ആശുപത്രികള്ക്ക് ജാഗ്രതാനിര്ദ്ദേശം നല്കാനും ജില്ലാകലക്ടര് നിര്ദ്ദേശം നല്കി.
കുറ്റ്യാടി റോഡില് വാഹനഗതാഗതം സുഗമമാക്കുന്നതിന് റോഡിലെ കുഴികള് അടിയന്തരമായി അടയ്ക്കാനും രാത്രിസമയങ്ങളില് വെളിച്ചം ഉറപ്പുവരുത്താനും ബന്ധപ്പെട്ട ഉദ്യോഗസ്ഥര്ക്ക് ജില്ലാ കലക്ടര് നിര്ദ്ദേശം നല്കി.
