കുമളി: കൊട്ടാരക്കര- ദിണ്ടിഗല് ദേശീയപാതയില് കുമളിക്ക് സമീപം ചെളിമടയില് വാഹനങ്ങള് കൂട്ടിയിടിച്ച് നാലുപേര്ക്ക് പരിക്കേറ്റു. ഞായര് രാവിലെ ഏഴോടെയായിരുന്നു അപകടം. ശബരിമല തീര്ഥാടനം കഴിഞ്ഞ് തമിഴ്നാട് വഴി തെലുങ്കാനയിലേക്ക് മടങ്ങുകയായിരുന്ന സംഘം സഞ്ചരിച്ച കാറും കുമളിയില്നിന്നും സത്രത്തിലേക്ക് വിനോദസഞ്ചാരികളുമായി പോയ ജീപ്പുമാണ് കൂട്ടിയിടിച്ചത്. കാറില് ഡ്രൈവര് ഉള്പ്പെടെ അഞ്ചുപേരുണ്ടായിരുന്നു. മൂന്നുപേരുടെ നില അതീവ ഗുരുതരമാണ്.
തെലങ്കാനയിലെ ദേവര്കൊണ്ട സ്വദേശികളായ അരാം ഭരത്, പ്രശാന്ത്, അരവിന്ദ്, കിഷോര് എന്നിവരെ കട്ടപ്പനയിലെ സ്വകാര്യ ആശുപത്രിയില് പ്രവേശിപ്പിച്ചു. ഗുരുതര പരിക്കേറ്റ ജീപ്പ് യാത്രികന് ബാലാജിയെ തേനി മെഡിക്കല് കോളേജ് ആശുപത്രിയിലേക്ക് മാറ്റി. കാര് ഡ്രൈവര് ഉറങ്ങിപ്പോയതാണ് കാരണമെന്നാണ് പ്രാഥമിക നിഗമനം. ജീപ്പില് ഉണ്ടായിരുന്ന മറ്റുള്ളവര്ക്ക് നിസാര പരിക്കുകളേയുള്ളു. കുമളി പൊലീസെത്തി മേല്നടപടികളെടുത്തു.
