കൊച്ചി. പരസ്യ പ്രതികരണം വിലക്കി താരസംഘടന അമ്മ. ആഭ്യന്തര വിഷയങ്ങൾ മാധ്യമങ്ങൾക്ക് മുന്നിൽ സംസാരിക്കരുതെന്ന് താരങ്ങൾക്ക് കർശന നിർദേശം നൽകി വരണാധികാരി. ഭാരവാഹി തെരഞ്ഞെടുപ്പുമായി ബന്ധപ്പെട്ട വിവാദങ്ങൾ ഉടലെടുത്തതോടെയാണ് പരസ്യ പ്രതികരണം വിലക്കിയിരിക്കുന്നത്.
താര സംഘടന അമ്മയുടെ തിരഞ്ഞെടുപ്പിന് ഒരാഴ്ച മാത്രം ബാക്കി നിൽക്കെ നാടകീയ രംഗങ്ങൾക്കാണ് സംഘടന സാക്ഷ്യം വഹിക്കുന്നത്. തെരഞ്ഞെടുപ്പുമായി ബന്ധപ്പെട്ട വിവാദങ്ങൾ ഉടലെടുത്തതോടെ പരസ്യ പ്രതികരണം വിലക്കിയിരിക്കുകയാണ് താരസംഘടനയായ അമ്മ. പരസ്യ പ്രതികരണം നടത്തിയാൽ കർശന നടപടിയെടുക്കുമെന്നാണ് വരണാധികാരി നിർദ്ദേശം നൽകിയത്. അമ്മയിലെ ആഭ്യന്തര വിഷയങ്ങളെക്കുറിച്ച് മാധ്യമങ്ങൾക്ക് മുന്നിൽ സംസാരിക്കരുതെന്നും താരങ്ങൾക്ക് മുന്നറിയിപ്പ് നൽകി. വിലക്ക് ലംഘിച്ചാൽ കർശന നടപടിയെന്ന് തെരഞ്ഞെടുപ്പ് വരണാധികാരികൾ പറഞ്ഞു.
അമ്മയിലെ സ്ഥാനാർഥി പ്രഖ്യാപനത്തിന് പിന്നാലെയാണ് ചേരിതിരിഞ്ഞ് താരങ്ങൾ ആരോപണ പ്രത്യാരോപണങ്ങൾ ഉന്നയിച്ചത്. മെമ്മറി കാർഡ് വിഷയത്തിൽ പൊന്നമ്മ ബാബു, ഉഷ ഹസീന, പ്രിയങ്ക എന്നിവർ കുക്കു പരമേശ്വരന് എതിരെ പരാതിയുമായി രംഗത്ത് വന്നിരുന്നു. ഇതിന് മറുപടിയെന്നോണം മാല പാർവതിയടക്കമുള്ള നടിമാർ പരസ്യ പ്രതികരണം നടത്തുകയും ചെയ്തു. ഇത്തരത്തിൽ പരസ്യമായ ആരോപണങ്ങളിലേക്ക് കടന്നതോടു കൂടിയാണ് വരണാധികാരിയുടെ ഇടപെടൽ.
ശ്വേതയ്ക്ക് എതിരായ പരാതിയിലും താരങ്ങൾ പരസ്യപ്രതികരണം നടത്തിയിരുന്നു. ഈ മാസം 15നാണ് അമ്മ സംഘ ടനയുടെ തിരഞ്ഞെടുപ്പ്.
