പത്തനംതിട്ട നെല്ലിക്കലിൽ വള്ളം മറിഞ്ഞുണ്ടായ അപകടത്തിൽ കാണാതായ യുവാവിന്റെ മൃതദേഹം കണ്ടെത്തി. നെല്ലിക്കൽ സ്വദേശി
ദേവ് ശങ്കറിന്റെ മൃതദേഹമാണ് കണ്ടെത്തിയത്. അപകടത്തിൽപ്പെട്ട രണ്ടുപേർ ഇന്നലെ മരിച്ചിരുന്നു. കോയിപ്രം നെല്ലിക്കൽ മാരൂ പറമ്പിൽ മിഥുൻ (30), കിടങ്ങന്നൂർ തങ്ങചേത്ത് മുകളിൽ രാഹുൽ (29) എന്നിവരുടെ മൃതദേഹം ആണ് കഴിഞ്ഞ ദിവസം കണ്ടെത്തിയത്. കോയിപ്രം നെല്ലിക്കൽ തൃക്കണ്ണാം പുഞ്ചയിൽ മീൻപിടിക്കാൻ പോയ വള്ളം മറിഞ്ഞാണ് അപകടം.
ഞായറാഴ്ച വൈകിട്ട് 6.30നാണ് നാടിനെ നടുക്കുന്ന സംഭവം. അഗ്നിരക്ഷാ സേന രാത്രി 9 വരെ തെരച്ചിൽ നടത്തിയെങ്കിലും മൂന്നാമത്തെ ആളെ കണ്ടെത്താനായിരുന്നില്ല. പെയ്ത്ത് വെള്ളം നിറഞ്ഞ് കിടന്ന പാടത്ത് പമ്പാനദി കരകവിഞ്ഞതോടെ ജല നിരപ്പ് ഉയർന്നിരുന്നു. മീൻ പിടിക്കാനായി ഇവർ വള്ളത്തിൽ കരയിൽ നിന്ന് 100 മീറ്ററോളം അകലെ എത്തിയപ്പോഴേക്കും വള്ളം മറിയുകയായിരുന്നു.
