സംസ്ഥാനത്ത് ഇന്നും അതിശക്തമായ മഴ തുടരും. പത്തനംതിട്ട കോട്ടയം എറണാകുളം ഇടുക്കി തൃശ്ശൂർ പാലക്കാട് മലപ്പുറം ജില്ലകളിലാണ് ഓറഞ്ച് അലർട്ട് പ്രഖ്യാപിച്ചിരിക്കുന്നത്. ബാക്കി എല്ലാ ജില്ലകളിലും എല്ലോ മുന്നറിയിപ്പും നിലവിലുണ്ട്.ബംഗാൾ ഉൾക്കടലിലെ ന്യൂനമർദം അതിതീവ്ര ന്യൂനമർദ്ദമായി രൂപാന്തരപ്പെട്ടതും അറബിക്കടലിൽ മഹാരാഷ്ട്ര തീരം മുതൽ കേരളതീരം വരെയുള്ള ന്യൂനമർദ്ദ പാത്തിയും മഴയുടെ ശക്തി വർദ്ധിപ്പിക്കും.
മഴയോടൊപ്പം മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ കാറ്റുവീശാനും സാധ്യതയുണ്ട്.അപകടകരമായ രീതിയിൽ ജലനിരപ്പ് ഉയർന്നതിനെ തുടർന്ന് പത്തനംതിട്ട ജില്ലയിലെ അച്ചൻകോവിൽ നദിയിൽ ഓറഞ്ച് അലർട്ടും ജില്ലയിലെ തന്നെ പമ്പാ നദിയിൽ യെല്ലോ മുന്നറിയിപ്പും നൽകി. തീരപ്രദേശത്തുള്ളവർക്കും മലയോര മേഖലയിൽ താമസിക്കുന്നവർക്കും പ്രത്യേക ജാഗ്രത നിർദ്ദേശമാണ് ദേശീയ ദുരന്ത നിവാരണ അതോറിറ്റിയും നൽകുന്നത്. ഈ മാസം 28 വരെ മത്സ്യബന്ധനത്തിനും വിലക്കേർപ്പെടുത്തി.
