പത്തനംതിട്ട. വിരണ്ടോടിയ കുതിര ഇടിച്ച് സ്കൂട്ടർ യാത്രികന് പരുക്ക്. പറക്കോട് സ്വദേശി ജോർജിനാണ് പരുക്കേറ്റത്. കുതിരയുടെ മുഖത്തും സാരമായ് പരിക്കേറ്റു. ഒടുവിൽ കുതിരയെ വരുതിയിലാക്കിയത് പെട്രോൾ പമ്പ് ജീവനക്കാർ
ഇന്ന് ഉച്ചയോടെയായിരുന്നു സംഭവം. പത്തനംതിട്ട സ്വദേശി ഷാജു മൂന്ന് ദിവസം മുമ്പ് പഞ്ചാബിൽ നിന്നും എത്തിച്ച ഹൈദർമാലിക് എന്ന 17 മാസം പ്രായമുള്ള കുതിരയാണ് വിരണ്ടോടിയത്. സെൻട്രൽ ജംഗ്ഷനിൽ നിന്നും സ്റ്റേഡിയം ഭാഗത്തേക്ക് ഓടുമ്പോഴാണ് ജോർജിനെ ഇടിച്ചിട്ടത്. ജോർജിന്റെസ്കൂട്ടറിൻ്റെ മുൻഭാഗവും തകർന്നു. ഒടുവിൽ സമീപത്തെ പെട്രോൾ പമ്പിലെത്തിയ കുതിരയെ അവിടുത്തെ ജീവനക്കാർ ചേർന്ന് പിടിച്ചു കെട്ടുകയായിരുന്നു. വീട്ടിൽ മറ്റാരും ഇല്ലാതിരുന്ന സമയത്ത് ജോലിക്കാരനായ തമിഴ് നാട് സ്വദേശി ഗണേശനാണ് കുതിരയെ പുറത്തിറക്കിയത്. നാടുമായി പരിചിതമല്ലാത്തതാണ് കുതിര വിരണ്ടോടാൻ കാരണമായത്. ജോർജിന്റെ പരുക്ക് ഗുരുതരമല്ല.
കുതിരയുടെ മുഖത്തും പുറത്തും കാലിലുമെല്ലാം പരുക്കേറ്റിട്ടുണ്ട്. കുട്ടികളുടെ മൊബൈൽ ഫോൺ ഉപയോഗം കുറയ്ക്കാനും മറ്റുമായാണ്
മകൻ ഹംദാന്റെ നിർബന്ധത്തിന് വഴങ്ങി ഷാജു കുതിരയെ വാങ്ങിയത്. പരുക്കേറ്റവരുടെ ചികിത്സാ ചെലവുകളും വാഹനത്തിന്റെ തകരാറും പരിഹരിച്ചു നൽകുമെന്ന് ഷാജു അറിയിച്ചു
