നിലമ്പൂരിൽ എം സ്വരാജിന്റെ വിജയം ഉറപ്പെന്ന് സി പി എം ; യുഡിഎഫില്‍ വലിയ പൊട്ടിത്തെറികള്‍ ഉണ്ടാകും – എം വി ഗോവിന്ദൻ

52
Advertisement

തിരുവനന്തപുരം: നിലമ്പൂരില്‍ ഇടതുമുന്നണി സ്ഥാനാർത്ഥി എം സ്വരാജ് വിജയിക്കുമെന്ന വിലയിരുത്തലുമായി സിപിഎം സംസ്ഥാന സെക്രട്ടറിയേറ്റ്.

സ്ഥാനാർത്ഥി പാർട്ടി ചിഹ്നത്തില്‍ മത്സരിച്ചത് ഇടതുവോട്ട് ഒന്നിപ്പിച്ചു. സർക്കാരിന്റെ വികസന നേട്ടങ്ങള്‍ ജനങ്ങള്‍ക്കിടയില്‍ ചർച്ചയായി. ജമാഅത്തെ ഇസ്ലാമി യുഡിഎഫിനു പിന്തുണ പ്രഖ്യാപിച്ചത് ഇടതിന് നേട്ടമായി. മതനിരപേക്ഷ ചിന്തയുള്ള സംഘടനകള്‍ ഇടതു മുന്നണിക്കൊപ്പം നിന്നെന്നും സംസ്ഥാന സെക്രട്ടറിയേറ്റ്. യോഗം വിലയിരുത്തി.

നിലമ്പൂർ മണ്ഡലത്തില്‍ സ്വരാജ് വൻഭൂരിപക്ഷത്തോടെ വലിയ വിജയം നേടുമെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ പറഞ്ഞു. ‘യുഡിഎഫിന്റെ തെറ്റായ പ്രചാരണങ്ങളെയും കള്ളക്കഥകളെയും തുറന്നുകാട്ടാൻ കഴിഞ്ഞു. വിവാദങ്ങള്‍ സൃഷ്ടിച്ച്‌ ജനങ്ങളുടെ കണ്ണില്‍ പൊടിയിടാനുള്ള അവരുടെ ശ്രമം ജനങ്ങള്‍ തള്ളിക്കളഞ്ഞു. മതനിരപേക്ഷ ഉള്ളടക്കത്തെ ഉയർത്തിക്കാട്ടാനും വർഗീയ കൂട്ടുകെട്ടുകളെ തുറന്നുകാട്ടാനും എല്‍ഡിഎഫിനു കഴിഞ്ഞു. ഇടത് സ്ഥാനാർത്ഥിക്ക് വൻ സ്വീകാര്യതയാണ് ലഭിച്ചത്. കോണ്‍ഗ്രസിനകത്തെ തർക്കങ്ങള്‍ കൂടുതല്‍ ശക്തിയായി പുറത്തുവരുന്നതിന് തിരഞ്ഞെടുപ്പ് ഫലം ഇടയാക്കും. നിലമ്പൂരിന് ശേഷം യുഡിഎഫിന് അകത്ത് വലിയ പൊട്ടിത്തെറികള്‍ ഉണ്ടാകും’- ഗോവിന്ദൻ പറഞ്ഞു.

Advertisement