Advertisement
കോഴിക്കോട് ലത്തീന്‍ രൂപത രൂപീകരണത്തിന്റെ ശതാബ്ദി വര്‍ഷത്തില്‍ അതിരൂപതയായി ഉയര്‍ത്തപ്പെട്ടു. ഫ്രാന്‍സിസ് മാര്‍പാപ്പയുടെ പ്രഖ്യാപനം മൂന്നരയോടെ വത്തിക്കാനിലും കോഴിക്കോട്ടെ രൂപത ആസ്ഥാനത്തും ഒരേസമയം നടന്നു. തലശ്ശേരി ആര്‍ച്ച് ബിഷപ്പ് മാര്‍ ജോസഫ് പാംപ്ലാനിയാണ് ഇത് വായിച്ചത്.
ഇതോടെ കോഴിക്കോട് രൂപതയുടെ ബിഷപ്പായിരുന്ന ഡോ. വര്‍ഗീസ് ചക്കാലയ്ക്കല്‍ ആര്‍ച്ച് ബിഷപ്പായി ഉയര്‍ത്തപ്പെട്ടു. കണ്ണൂര്‍, സുല്‍ത്താന്‍പേട്ട് രൂപതകള്‍ ഇനി കോഴിക്കോട് അതിരൂപതയുടെ കീഴിലാകും. 2012 മുതല്‍ കോഴിക്കോട് രൂപതാധ്യക്ഷനായിരുന്നു ഡോ. വര്‍ഗീസ് ചക്കാലയ്ക്കല്‍.
ആര്‍ച്ച് ബിഷപ്പായി സ്ഥാനമേറ്റ ഡോ. വര്‍ഗീസ് ചക്കാലയ്ക്കലിനെ എം.പിമാരായ കെ.സി. വേണുഗോപാല്‍, എം.കെ. രാഘവന്‍, ടി. സിദ്ദിഖ് എം.എല്‍.എ എന്നിവര്‍ നേരിട്ടെത്തി അഭിനന്ദിച്ചു.
Advertisement
