കൊല്ലം: ഷാര്ജയില് വെച്ച് മരിച്ച നിലയില് കണ്ടെത്തിയ അതുല്യയുടെ കേസില് ഭര്ത്താവ് സതീഷിന്റെ മുന്കൂര് ജാമ്യം കോടതി റദ്ദാക്കി. കൊല്ലം പ്രിന്സിപ്പല് സെഷന്സ് കോടതിയുടേതാണ് നടപടി. കൊലപാതകത്തിന് പ്രഥമദൃഷ്ട്യാ തെളിവില്ലെന്ന് കോടതി നിരീക്ഷിച്ചു. എഫ്ഐആറില് ചേര്ത്ത കൊലപാതക വകുപ്പുകള് നിലനില്ക്കില്ലെന്നും കോടതി നിരീക്ഷിച്ചു.
ആത്മഹത്യാ പ്രേരണക്കുള്ള വകുപ്പുകള് പ്രോസിക്യൂഷന് ചേര്ക്കാത്തതില് കോടതി നിരാശ പ്രകടിപ്പിച്ചു. മരണം കൊലപാതകമെന്ന് കാണിച്ചാണ് ചവറ തെക്കും ഭാഗം പൊലീസ് കേസെടുത്തത്. ഇതാണ് കൊല്ലം പ്രിന്സിപ്പല് സെഷന്സ് കോടതി തള്ളിയത്. മുന്കൂര് ജാമ്യം റദ്ദാക്കിയതോടെ പ്രതി സതീഷ് ക്രൈംബ്രാഞ്ച് ഓഫീസില് ഹാജരായി. നേരത്തെ സതീഷിനെ ക്രൈബ്രാഞ്ച് അറസ്റ്റ് ചെയ്തെങ്കിലും മുന്കൂര് ജാമ്യത്തെ തുടര്ന്ന് വിട്ടയക്കുകയായിരുന്നു.
ജൂലൈ 19നാണ് തേവലക്കര സ്വദേശി അതുല്യയെ ഷാര്ജയിലെ ഫ്ളാറ്റില് ജീവനൊടുക്കിയ നിലയില് കണ്ടെത്തിയത്. ഇതിന് പിന്നാലെ അതുല്യയെ ഭര്ത്താവ് സതീഷ് ഉപദ്രവിക്കുന്ന ദൃശ്യങ്ങളും ശരീരത്തില് മര്ദനമേറ്റതിന്റെ വീഡിയോകളും പുറത്തുവന്നിരുന്നു.
