വിവാഹത്തിന് സ്വര്‍ണാഭരണങ്ങള്‍ക്ക് പുറമേ ഇമിറ്റേഷന്‍ ആഭരണങ്ങള്‍ അണിഞ്ഞ് വധു എത്തുന്നത് വരന്റെ വീട്ടുകാര്‍ എതിര്‍ത്തതോടെ വിവാഹത്തില്‍ നിന്ന് വധു പിന്മാറി. സംഭവത്തില്‍ പൊലീസ് ഇടപെട്ട് പ്രശ്‌നം പരിഹാര ചര്‍ച്ച നടക്കവെയാണ് വധു വിവാഹത്തില്‍ നിന്ന് പിന്മാറുകയാണെന്നറിയിച്ചത്. രണ്ട് വര്‍ഷം മുന്‍പായിരുന്നു ഇവരുടെ വിവാഹ നിശ്ചയം നടന്നത്.
ആലപ്പുഴ ഹരിപ്പാടിനടുത്തുള്ള ഒരു ക്ഷേത്രത്തില്‍വെച്ച് ഇന്നലെയായിരുന്നു ഇവരുടെ വിവാഹം നടക്കേണ്ടിയിരുന്നത്. 15 പവന്‍ ആഭരണങ്ങള്‍ക്ക് പുറമെ ഇമിറ്റേഷന്‍ ആഭരണങ്ങളും അണിയിക്കുമെന്ന് വരന്റെ കുടുംബത്തെ വധുവിന്റെ അമ്മ അറിയിച്ചിരുന്നു. എന്നാല്‍ കല്യാണത്തിന് മുന്‍പ് നടക്കുന്ന ‘ഹല്‍ദി’ ചടങ്ങില്‍ വെച്ച് മുക്കുപണ്ടം അണിയിച്ച് കല്യാണം വേണ്ടെന്ന തരത്തില്‍ വരന്റെ വീട്ടുകാര്‍ സംസാരിച്ചു എന്നാണ് ആരോപണം. ഇതോടെ ഇരു കുടുംബങ്ങളും തമ്മില്‍ അഭിപ്രായവ്യത്യാസമുണ്ടായി.
വധുവിന്റെ കുടുംബം തുടര്‍ന്ന് പൊലീസില്‍ പരാതി നല്‍കി. ശേഷം നടന്ന ചര്‍ച്ചയില്‍ വരന്റെ വീട്ടുകാര്‍ വിവാഹത്തിന് സമ്മതിക്കുകയായിരുന്നു. എന്നാല്‍ ഇത്തരത്തിലൊരു ആക്ഷേപം നടന്നതിനാല്‍ വിവാഹത്തിന് താത്പര്യമില്ലെന്ന് പെണ്‍കുട്ടി തന്നെ അറിയിക്കുകയായിരുന്നു. വിവാഹത്തില്‍ നിന്ന് പിന്മാറുന്നതായി പൊലീസിനെ എഴുതി അറിയിക്കുകയും ചെയ്തു.
വരന്റെ വീട്ടുകാര്‍ കല്യാണച്ചിലവിനായി പണവും ആഭരണങ്ങളും വാങ്ങിയിരുന്നതായും പെണ്‍കുട്ടിയുടെ കുടുംബം ആരോപിച്ചു. 50,000 രൂപയും നാലരപ്പവന്റെ മാലയുമാണ് വാങ്ങിയത്. ഇവയും നിശ്ചയത്തിനും കല്യാണ ഒരുക്കങ്ങള്‍ക്കും മറ്റും ചിലവായ തുകയും അടക്കം മടക്കിക്കിട്ടാന്‍ വേണ്ട നടപടികള്‍ സ്വീകരിക്കുമെന്നും പെണ്‍കുട്ടിയുടെ കുടുംബം പറഞ്ഞു.