കുഞ്ഞുമോളുടെ കുടുംബത്തെ ആശ്വസിപ്പിച്ച് കൊടിക്കുന്നിൽ

September 17, 2024

ശാസ്താംകോട്ട:മൈനാഗപ്പള്ളി ആനൂര്‍ക്കാവില്‍ തിരുവോണ ദിവസം വൈകുന്നേരം നടന്ന ദാരുണമായ വാഹനാപകടത്തിൽ കൊല്ലപ്പെട്ട പഞ്ഞിപുല്ലുംവിളയില്‍ കുഞ്ഞുമോളുടെ വീട്ടിൽ കൊടിക്കുന്നിൽ സുരേഷ് എം.പി സന്ദർശനം നടത്തി.മക്കളെയും ഭർത്താവിനെയും മറ്റ് ബന്ധുക്കളെയും അദ്ദേഹം ആശ്വസിപ്പിച്ചു.അപകടസ്ഥലത്ത് എത്തിയ എം.പി പ്രദേശവാസികളുമായി സംസാരിച്ച് അപകടത്തിന്റെ കൂടുതൽ വിവരങ്ങൾ ചോദിച്ചറിഞ്ഞു.അപകടത്തിൽ പ്രതികളായ യുവാവും സഹയാത്രികയായ ഡോക്ടറും മദ്യപിച്ച് കാർ ഓടിച്ച സംഭവത്തിൽ തങ്ങളുടെ മൃഗീയമായ പ്രവൃത്തിക്ക് യാതൊരു വിധത്തിലുമുള്ള സംരക്ഷണവും നൽകാതെ കുറ്റമറ്റ അന്വേഷണത്തിനായി പോലീസിന്റെ ഭാഗത്തു നിന്നും ഉടൻ നടപടികൾ കൈക്കൊള്ളണം.അപകടവുമായി ബന്ധപ്പെട്ട സാക്ഷികളും തെളിവുകളും വ്യക്തമായ സാഹചര്യത്തിൽ പ്രതികൾക്കെതിരെ കുറ്റപത്രം ഉടൻ സമർപ്പിച്ച് പരമാവധി ശിക്ഷ ഉറപ്പാക്കണമെന്നും കുഞ്ഞുമോളുടെ കുടുംബത്തിന് മുഖ്യമന്ത്രിയുടെ ദുരിതാശ്വാസനിധിയിൽ നിന്ന് അടിയന്തര സഹായം അനുവദിക്കണമെന്നും കൊടിക്കുന്നിൽ സുരേഷ് ആവശ്യപ്പെട്ടു.മൈനാഗപ്പള്ളി പഞ്ചായത്ത് പ്രസിഡന്റ് വർഗീസ് തരകനും എം.പിക്കൊപ്പം ഉണ്ടായിരുന്നു.

ആകാശമൊന്നും ഇടിഞ്ഞുവീഴില്ലെന്ന് സുപ്രിം കോടതി; ബുൾഡോസർ രാജിന് താത്കാലിക സ്‌റ്റേ

September 17, 2024

ന്യൂ ഡെൽഹി :

കുറ്റവാളികളുടേത് ഉൾപ്പടെയുള്ള വീടുകൾ ബുൾഡോസർ ഉപയോഗിച്ച് മുന്നറിയിപ്പ് നൽകാതെ പൊളിക്കുന്നതിന് സുപ്രീം കോടതിയുടെ താൽക്കാലിക സ്റ്റേ. കോടതികളുടെ അനുമതിയില്ലാതെ കെട്ടിടങ്ങളും വീടുകളും ഭരണകൂടം ബുൾഡോസർ ഉപയോഗിച്ച് പൊളിക്കരുതെന്ന് സുപ്രീംകോടതി നിർദ്ദേശിച്ചു.

പൊതുറോഡുകൾ, നടപ്പാതകൾ, റെയിൽവേ ലൈനുകൾ, ജലാശയങ്ങൾ എന്നിവയിലെ കൈയേറ്റങ്ങൾക്ക് വിലക്ക് ബാധകമല്ല. ജസ്റ്റിസുമാരായ ബി.ആർ ഗവായ്, കെ.വി വിശ്വനാഥൻ എന്നിവരടങ്ങിയ ബെഞ്ചിന്റേതാണ് സുപ്രധാന വിധി. ബുൾഡോസർ മുന്നറിയിപ്പില്ലാതെ ഉപയോഗിക്കുന്നതിന് എതിരായ ഹർജികൾ ഒക്ടോബർ ഒന്നിന് വീണ്ടും പരിഗണിക്കും.

നിയമപരമായി അധികാരമുള്ളവരുടെ കൈകൾ ഇത്തരത്തിൽ കെട്ടിയിടാൻ പാടില്ലെന്ന് പറഞ്ഞുകൊണ്ട് സോളിസിറ്റർ ജനറൽ ഓഫ് ഇന്ത്യ തുഷാർ മേത്ത കോടതി ഉത്തരവിനെതിരെ എതിർപ്പ് ഉന്നയിച്ചു. എന്നാൽ, രണ്ടാഴ്ചത്തേക്ക് ഇത്തരം പൊളിക്കൽ നടപടികൾ നിർത്തിവെച്ചാൽ ആകാശം ഇടിഞ്ഞ് വീഴില്ലെന്നായിരുന്നു കോടതിയുടെ പ്രതികരണം.

2018ലെ പ്രളയത്തിൽ മണലിന് അടിയിൽപെട്ടതെന്ന് കരുതുന്ന വള്ളം കണ്ടെത്തി

September 17, 2024

ആറന്മുള: 2018ലെ ജലപ്രളയത്തിൽ മണലിന് അടിയിൽപെട്ടതെന്ന് കരുതുന്ന വള്ളം മരുതൂർകടവിൽ കണ്ടു. മണലിന് അടിയിൽനിന്ന് ലഭിച്ചതാണെന്ന സംശയാണ് നാട്ടുകാർ പറയുന്നത്. ആറന്മുള വള്ളംകളിയുടെ സ്റ്റാർട്ടിങ് പോയിന്റായ നിക്ഷേപമാലിക്ക് സമീപത്താണ് മരുതൂർകടവ്.

പള്ളിയോടങ്ങൾക്ക് തടസ്സമാകുന്ന വിധത്തിൽ പമ്പാനദിയിൽ രൂപപ്പെട്ടിരുന്ന മൺപുറ്റ് നീക്കുന്ന പ്രവൃത്തികൾ ഇപ്പോൾ നടക്കുന്നുണ്ട്. ബോട്ട് ഇവിടെനിന്ന് ലഭിച്ചതാകാമെന്നാണ് നാട്ടുകാർ പറയുന്നത്. സംഭവത്തിൽ പൊലീസും പരിശോധന നടത്തുന്നുണ്ട്.

നിപ്പയിൽ ആശ്വാസം: 3 പേരുടെ പരിശോധനാ ഫലങ്ങള്‍ കൂടി നെഗറ്റീവ്

September 17, 2024

മലപ്പുറം: നിപ്പ ബാധിച്ച് യുവാവ് മരിച്ച മലപ്പുറത്ത് മൂന്ന് പേരുടെ പരിശോധനാ ഫലങ്ങള്‍ കൂടി നെഗറ്റീവായതായി ആരോഗ്യ മന്ത്രി വീണാ ജോര്‍ജ് അറിയിച്ചു. ഇതോടെ 16 പേരുടെ പരിശോധനാ ഫലങ്ങളാണ് നെഗറ്റീവായത്. ആകെ 255 പേരാണ് സമ്പര്‍ക്ക പട്ടികയിയിലുള്ളത്. അതില്‍ 50 പേര്‍ ഹൈറിസ്‌ക് സമ്പര്‍ക്കപ്പട്ടികയിലാണുള്ളത്. രോഗ ബാധയെ തുടർന്ന് മേഖലയിൽ ശക്തമായ നിരീക്ഷണം നടക്കുന്നത് കൊണ്ടാണ് ഈ വർധനവെന്നും ആശങ്കപ്പെടാനില്ലെന്നും ആരോഗ്യമന്ത്രി വീണാ ജോർജ് പറഞ്ഞു.

മലപ്പുറത്ത് എം പോക്സ് സംശയിക്കുന്ന വ്യക്തിയുടെ കൂടെ സഞ്ചരിച്ച ആളുകളുടെ വിവരങ്ങൾ എടുത്തിട്ടുണ്ട്. രോഗം സ്ഥിരീകരിച്ചാൽ ഇവർക്കും ജാഗ്രത നിർദേശം നൽകുമെന്നും വീണാ ജോർജ് പറഞ്ഞു.

അതേസമയം, എയിംസ് വിഷയത്തിൽ കേരളത്തിന് വ്യക്തമായ നിലപാട് ഉണ്ടെന്നും കോഴിക്കോട് കിനാലൂരിൽ മതിയായ സ്ഥലം ഉണ്ടെന്ന് കേന്ദ്രത്തെ രേഖാമൂലം അറിയിച്ചതാണെന്നും വീണാ ജോർജ് പറഞ്ഞു. ഇക്കാര്യത്തിൽ സംസ്ഥാന സർക്കാരിന് ആശയക്കുഴപ്പമില്ല. കേന്ദ്ര ആരോഗ്യ മന്ത്രി അനുകൂല നിലപാട് സ്വീകരിച്ചിട്ടുണ്ട്. കേരളത്തിലെ ആരോഗ്യരംഗം മികച്ചതായത് കൊണ്ടായിരിക്കാം എയിംസ് കിട്ടാതെ പോയത്. അനുകൂല സമീപനം ഉടൻ ഉണ്ടാകുമെന്നാണു പ്രതീക്ഷയെന്നും വീണാ ജോർജ് പറഞ്ഞു.

ഈ പച്ചക്കറി പതിവായി കഴിക്കൂ, മലബന്ധ പ്രശ്നം തടയാം

September 17, 2024

തെറ്റായ ജീവിതശെെലി മൂലം ഇന്ന് പലരിലും കാണുന്ന പ്രശ്നമാണ് മലബന്ധം. വൻകുടലിലെ അമിതമായ വരൾച്ച, ഭക്ഷണത്തിലെ നാരുകളുടെ അഭാവം, നല്ല കൊഴുപ്പ് അഭാവം എന്നിവ മൂലമാണ് ഇത് സംഭവിക്കുന്നത്. മലബന്ധം ഒരു ദഹനനാളത്തിൻ്റെ ആരോഗ്യപ്രശ്നമാണ്. മലബന്ധം ഉണ്ടാകുന്നതിന് പിന്നിലെ ചില കാരണങ്ങൾ..

ഭക്ഷണത്തിലെ ആരോഗ്യകരമായ നാരുകളുടെ അഭാവവും വെള്ളത്തിന്റെ കുറവും വൻകുടൽ ഉണങ്ങുന്നതിനും മലബന്ധത്തിൻ്റെ ലക്ഷണങ്ങൾ ഉണ്ടാക്കുന്നതിനും കാരണമാകുന്നു. പഴങ്ങൾ, പച്ചക്കറികൾ, ധാന്യങ്ങൾ എന്നിവയിൽ നാരുകൾ അടങ്ങിയിട്ടുണ്ട്.

രാത്രി വൈകി അത്താഴം കഴിക്കുക, വൈകി ഉറങ്ങുക, വൈകി ഉണരുക തുടങ്ങിയവ മലബന്ധത്തിന് കാരണമാകും. വൈകി അത്താഴം കഴിക്കുന്നത് ദഹന പ്രവർത്തനങ്ങൾ മന്ദഗതിയിലാക്കുന്നു.

ചില മരുന്നുകൾ, പ്രത്യേകിച്ച് ഒപിയോയിഡുകൾ, അലൂമിനിയം അടങ്ങിയ ആൻ്റാസിഡുകൾ, ചില ആൻ്റീഡിപ്രസൻ്റുകൾ എന്നിവയുടെ പാർശ്വഫലമായി മലബന്ധം ഉണ്ടാകാം. ഹൈപ്പോതൈറോയിഡിസം, പ്രമേഹം, ന്യൂറോളജിക്കൽ ഡിസോർഡേഴ്സ് തുടങ്ങിയ ആരോഗ്യപ്രശ്നങ്ങൾ പോലും കുടലിൻ്റെ പ്രവർത്തനത്തെ പ്രതികൂലമായി ബാധിക്കുകയും മലബന്ധത്തിലേക്ക് നയിക്കുകയും ചെയ്യും. സമ്മർദ്ദം, ഉത്കണ്ഠ, വിഷാദം എന്നിവ കുടലിൻ്റെ ആരോഗ്യത്തെയും കുടലിൻ്റെ ചലനത്തെയും ബാധിക്കുകയും ചെയ്യും.

മലബന്ധം അകറ്റാൻ സവാള

മലബന്ധ പ്രശ്നം തടയുന്നതിന് മികച്ചതാണ് സവാള. നല്ല കുടൽ ബാക്ടീരിയയെ വർദ്ധിപ്പിക്കുന്ന ഇൻസുലിൻ പോലുള്ള പ്രീബയോട്ടിക്സും സവാളയിൽ ധാരാളമുണ്ട്. സവാളയിൽ ആൻ്റിഓക്‌സിഡൻ്റുകളും ആൻറി-ഇൻഫ്ലമേറ്ററി സംയുക്തങ്ങളും അടങ്ങിയിട്ടുണ്ട്. അത് മൊത്തത്തിലുള്ള കുടലിൻ്റെ ആരോഗ്യം മെച്ചപ്പെടുത്തുക ചെയ്യും.

സവാള ദിവസവും പച്ചയ്ക്ക് കഴിക്കുന്നത് മലബന്ധം അകറ്റാൻ മാത്രമല്ല കൊളസ്ട്രോൾ അളവ് നിയന്ത്രിക്കാനും സഹായിക്കും. ദിവസവും സവാള ജ്യൂസ് കുടിക്കുന്നതും വിവിധ ദഹനപ്രശ്നങ്ങൾ അകറ്റുന്നതിന് ഫലപ്രദമാണെന്ന് പഠനങ്ങൾ പറയുന്നു.

ലിഫ്റ്റ് പണിമുടക്കി: പത്തനംതിട്ട ജനറൽ ആശുപത്രിയിൽ രോഗികളെ കൊണ്ടുപോകുന്നത് തുണിയിൽ പൊതിഞ്ഞ്

September 17, 2024

പത്തനംതിട്ട: ലിഫ്റ്റ് തകരാറിലായതോടെ പത്തനംതിട്ട ജനറൽ ആശുപത്രിയില്‍ രോഗികളെ മുകൾ നിലയിൽ നിന്നു താഴെയത്തിച്ചതു തുണിയിൽ പൊതിഞ്ഞ്. മുളങ്കമ്പുകൾ തുണിയിൽ കെട്ടിയുണ്ടാക്കിയ തുണി സ്ട്രെച്ചറിലാണു രോഗികളെ മുകൾ നിലയിൽനിന്നു താഴേക്ക് ഇറക്കിയത്.

കഴിഞ്ഞ 4 ദിവസത്തിലേറെയായി ലിഫ്റ്റ് തകരാറിലാണെന്നും ദിവസവും ഏഴും എട്ടും രോഗികളെയാണ് ഇത്തരത്തിൽ തുണി സ്ട്രെച്ചറിൽ കൊണ്ടു പോകുന്നതെന്നും രോഗികളും കൂട്ടിരിപ്പുകാരും ആരോപിച്ചു. കഴിഞ്ഞദിവസം ഇത്തരത്തിൽ കൊണ്ടുപോകുമ്പോൾ രോഗി താഴെ വീഴുന്ന അവസ്ഥയുണ്ടായെന്നും ആരോപണമുണ്ട്.

ആശുപത്രിയുടെ മൂന്നാം നിലയിലാണു ഓപ്പറേഷൻ തിയേറ്ററുള്ളത്. അടിയന്തരമായി ഓപ്പറേഷൻ തിയേറ്ററിലെത്തിക്കേണ്ട രോഗികളെയും ഓപ്പറേഷൻ കഴിഞ്ഞു കിടക്കുന്ന രോഗികളെയും ഇങ്ങനെ കൊണ്ടുപോകേണ്ട അവസ്ഥയാണ്. ഓപ്പറേഷൻ കഴിഞ്ഞ രോഗികള്‍ക്ക് സ്കാനിങ്, എക്സ് റേ എടുക്കേണ്ടി വന്നാലും താഴെയിറങ്ങാൻ മറ്റു വഴിയില്ല. പഴയ കെട്ടിടമായതിനാൽ റാംപ് സൗകര്യം ഇല്ല. ചുമന്നു മാറ്റാനായി ഒട്ടേറെ ജീവനക്കാരുടെ ആവശ്യമുള്ളതിനാൽ ജീവനക്കാർ വരുന്നതു വരെ കാത്തിരിക്കേണ്ട അവസ്ഥയാണെന്നും പലപ്പോഴും കൂട്ടിരുപ്പുകാർ കൂടി സഹായിച്ചിട്ടാണ് രോഗികളെ പുറത്തെത്തിക്കുന്നത് എന്നും അതീവ ഗുരുതരമായ ഈ കാര്യം ആശുപത്രി അധികൃതരോടു പരാതിപ്പെട്ടിട്ടും നടപടിയുണ്ടായില്ലെന്നും രോഗികളുടെ ബന്ധുക്കൾ പറഞ്ഞു.

ബിജെപിക്ക് വേണ്ടി പ്രവർത്തിക്കുന്ന സ്വാതി മാലിവാൾ രാജിവെക്കണമെന്ന് എഎപി

September 17, 2024

ന്യൂ ഡെൽഹി :
സ്വാതി മലിവാളിനോട് രാജ്യസഭാ അംഗത്വം രാജിവെക്കാൻ ആവശ്യപ്പെട്ട് ആം ആദ്മി പാർട്ടി. അതിഷിയുടെ കുടുംബത്തിന് എതിരെ സമൂഹ മാധ്യമ പോസ്റ്റ് ഇട്ടതിന് പിന്നാലെയാണ് നടപടി. എഎപി എം പി ആണെങ്കിലും സ്വാതി പ്രവർത്തിക്കുന്നത് ബിജെപിക്ക് വേണ്ടിയെന്ന് ആംആദ്മി ആരോപിച്ചു.

പാർലമെന്റ് ആക്രമണ കേസ് പ്രതി അഫ്സൽ ഗുരുവിനെ വിട്ടുകിട്ടാൻ പ്രതിഷേധം ഉയർത്തിയ കുടുംബത്തിൽ നിന്ന് ഒരാൾ ഡൽഹി മുഖ്യമന്ത്രി ആയിരിക്കുന്നുവെന്നും ഡൽഹിയെ ദൈവം രക്ഷിക്കട്ടെയെന്നുമായിരുന്നു സ്വാതിയുടെ പ്രതികരണം. അതിഷി ഡമ്മി മുഖ്യമന്ത്രിയെന്നും സ്വാതി ആരോപിച്ചു. ഇതിന് പിന്നാലെയാണ് രാജ്യസഭാ അംഗത്വം രാജിവെക്കാൻ സ്വാതി മലിവാളിനോട് ആവശ്യപ്പെട്ടത്.

ആം ആദ്മി രാഷ്ട്രീയകാര്യ സമിതി ചേർന്നാണ് അതിഷിയെ മുഖ്യമന്ത്രിയായി തീരുമാനിച്ചത്. മുതിർന്ന നേതാവ് മനീഷ് സിസോദിയ അടക്കമുള്ള നേതാക്കൾ അതിഷിയെ പിന്തുണച്ചിരുന്നു. ഡൽഹിയുടെ മൂന്നാമത്തെ വനിതാ മുഖ്യമന്ത്രിയാണ് അതിഷി.

പാദങ്ങളുടെ നിറം കൂട്ടാനും കറുത്ത പാടുകൾ മാറ്റാനും ഇവയൊന്ന് പരീക്ഷിക്കൂ

September 17, 2024

പാദങ്ങൾ വൃത്തിയാക്കി വയ്ക്കുന്നത് അത്ര എളുപ്പമുള്ള കാര്യമല്ല. വരൾച്ചയും വിണ്ടു കീറലും നഖത്തിന്റെ പൊട്ടലുമൊക്കെ സൃഷ്ടിക്കുന്ന പ്രശ്നങ്ങൾ പാദങ്ങളെ അനാകർഷകമാക്കും. പാദങ്ങൾക്കു മതിയായ ശ്രദ്ധ ചെലുത്താത്തതാണ് പ്രധാന പ്രശ്നം. സിംപിളായി കാലുകളെ മിനുക്കിയെടുക്കാനുള്ള ചില പൊടികൈകൾ എന്തൊക്കെയാണെന്ന് നോക്കാം

ശുചിത്വം

പാദങ്ങളുടെ ഭംഗിക്ക് ആദ്യം വേണ്ടത് ശുചിത്വമാണ്. ഇളം ചൂടുവെള്ളത്തിൽ ഷാംപൂ ചേർത്ത് അതിൽ നാരങ്ങാ നീര് ചേർത്തിളക്കി, പത്ത് മിനിറ്റു നേരം പാദങ്ങൾ മുക്കി വയ്‌ക്കുക. ശേഷം പഴയ ടൂത്ത് ബ്രഷ് കൊണ്ട് നഖത്തിനിടയിലെ ചെളി കളഞ്ഞ് വൃത്തിയാക്കുക. ദിവസവും ചെയ്താൽ നല്ല മാറ്റം കാണാൻ സാധിക്കും. നല്ലതിരക്കുള്ളവർ ആണെങ്കിൽ ആഴ്‌ചയിൽ ഒരിക്കൽ എങ്കിലും ചെയ്യാൻ മറക്കരുത്.

വിണ്ടു കീറൽ ഒഴിവാക്കാം

പാദങ്ങളിലെ വിണ്ടുകീറൽ പലർക്കും ഉള്ള പ്രശ്നമാണ്. അത് കാലിന്റെ ശോഭ തന്നെ ഇല്ലാതാക്കും. ഇതിനായി രണ്ടു സ്പൂണ്‍ ഗ്ലിസറിനും നാരങ്ങാ നീരും ചേര്‍ത്ത് ദിവസവും കുളികഴിഞ്ഞ് കാലില്‍ തേച്ചുപിടിപ്പിക്കാം. ഇത് കൂടാതെ പെട്രോളിയം ജെല്ലി കാലുകളില്‍ പുരട്ടി സോക്‌സിട്ട് രാത്രിയില്‍ കിടന്നുറങ്ങുന്നതും മികച്ച പ്രതിവിധിയാണ്. കാലുകള്‍ മൃദുലമാകാനും ഇത് നല്ലതാണ്.

തിളക്കത്തിന്

പാദങ്ങൾ കണ്ണാടി പോലെ തിളങ്ങാൻ ചില പൊടിക്കൈകൾ നമ്മുടെ അടുക്കളയിൽ തന്നെ ഉണ്ട്. അതിനായി തൈരും നാരങ്ങനീരും ഗ്ലിസറിനും കടലമാവും ചേര്‍ത്ത് പേസ്റ്റ് പോലെയാക്കിയ മിശ്രിതം കാലുകളില്‍ പുരട്ടിയിടാം. പത്തോ പതിനഞ്ചോ മിനിറ്റു കഴിഞ്ഞ് കഴുകികളയാം. നല്ല മാറ്റം നിങ്ങൾക്ക് കാണാൻ പറ്റും. ഇതുകൂടാതെ ആഴ്ചയിലൊരിക്കല്‍ കാലുകളില്‍ എണ്ണ പുരട്ടി തടവാം. അല്ലെങ്കിൽ പാല്‍പ്പാട, നാരങ്ങനീര്,ഗ്ലിസറിന്‍ കസ്തൂരി മഞ്ഞള്‍ എന്നിവ ചേർത്ത് കാലിൽ പുരട്ടാം.

നാരങ്ങ നീര്

നാരങ്ങ നീര് കാലിൽ പുരട്ടുന്നതും വളരെ മികച്ചതാണ്. ഇത് നിറം വർധിപ്പിക്കാനും പാടുകൾ അകറ്റാനും സഹായിക്കും. ദിവസവും ചെയ്യാൻ മറക്കരുത്. കാരണം മാറ്റം നിങ്ങൾ ആഗ്രഹിക്കുന്നെങ്കിൽ തുടർച്ചയായി അതിനായി പരിശ്രമിക്കണം..

കെ സുധാകരന്‍റെ എക്‌സ് അക്കൗണ്ട് ഹാക്ക് ചെയ്തു

September 17, 2024

തിരുവനന്തപുരം: കെ സുധാകരന്‍റെ എക്‌സ് അക്കൗണ്ട് ഹാക്ക് ചെയ്തു. @SudhakaranINC എന്ന വെരിഫൈഡ് അക്കൗണ്ടാണ് ഹാക്ക് ചെയ്യപ്പെട്ടത്. ഹാക്ക് ചെയ്യപ്പെട്ട പേജിന്റെ പാസ്‌വേഡ് ഉൾപ്പെടെ അജ്ഞാതർ മാറ്റിയതിനാൽ ഈ പേജിന്റെ നിയന്ത്രണം ഏറ്റെടുക്കാൻ ഇതുവരെ കഴിഞ്ഞിട്ടില്ല.ഡിജിപിക്കും എക്‌സ് അധികൃതര്‍ക്കും കെ.സുധാകരന്‍ പരാതി നല്‍കി.
കെപിസിസി പ്രസിഡന്റ് കെ.സുധാകരന്‍ എംപിയുടെ എക്‌സ് അക്കൗണ്ട്(മുമ്പ് ട്വിറ്റര്‍) ഹാക്ക് ചെയ്തു. @SudhakaranINC എന്ന വെരിഫൈഡ് അക്കൗണ്ടാണ് ഹാക്ക് ചെയ്തത്. ഹാക്ക് ചെയ്യപ്പെട്ട പേജിന്റെ പാസ്‌വേഡ് ഉൾപ്പെടെ അജ്ഞാതർ മാറ്റിയതിനാൽ ഈ പേജിന്റെ നിയന്ത്രണം ഏറ്റെടുക്കാൻ ഇതുവരെ കഴിഞ്ഞിട്ടില്ല.

കെ.സുധാകരന്‍ എന്ന പേരും പ്രൊഫൈല്‍ ചിത്രവും അജ്ഞാതര്‍ മാറ്റിയെങ്കിലും @SudhakaranINC എന്ന അഡ്രസ്സ് മാറ്റാന്‍ ഹാക്കർമാർക്ക് സാധിച്ചിട്ടില്ല. നിയമ നടപടി ആവശ്യപ്പെട്ട് ഡിജിപിക്ക് പരാതി നൽകി

മൈനാഗപ്പളളി അപകടം: പ്രതികളെ കസ്റ്റഡിയിൽ വാങ്ങാൻ പോലീസ്,അജ്മലിൻ്റെ ലൈസൻസ് സസ്പെൻ്റ് ചെയ്യും

September 17, 2024

ശാസ്താംകോട്ട.നാളെ കസ്റ്റഡി അപേക്ഷ നൽകാൻ തീരുമാനം. കസ്റ്റഡിയിൽ വാങ്ങിയ ശേഷം പ്രതികളുമായി തെളിവെടുക്കും.
മൈനാഗപ്പളളി അപകടം: അജ്മലിൻ്റെ ലൈസൻസ് ഉടൻ സസ്പെൻ്റ് ചെയ്യും. അന്വേഷണ ഉദ്യോഗസ്ഥൻ്റെ റിപ്പോർട്ടിൻ്റെ അടിസ്ഥാനത്തിലാകും മോട്ടർ വാഹന വകുപ്പിൻ്റെ നടപടി. അജ്മലിൻ്റെ കൂടി വിശദീകരണം കേട്ട ശേഷമാകും ലൈസൻസ് റദ്ദാക്കുക