കൊട്ടിയം: വിദ്യാര്‍ത്ഥികള്‍ സഞ്ചരിച്ച സ്‌കൂട്ടര്‍ റോഡരികില്‍ നിര്‍ത്തിയിട്ടിരുന്ന ഹിറ്റാച്ചി കയറ്റി വച്ചിരുന്ന ടിപ്പര്‍ ലോറിക്ക് പുറകിലേക്ക് ഇടിച്ചു കയറി ഒരാള്‍ മരിച്ചു. മറ്റൊരാള്‍ക്ക് പരിക്കേറ്റു. കൂട്ടിക്കട ചക്കാലയില്‍ വീട്ടില്‍ നിന്നും അയത്തില്‍ തറാക്കുടി കാഷ്യു ഫാക്ടറിക്ക് സമീപം താമസിക്കുന്ന ഷാജഹാന്റെയും ലൂസിയയുടെയും മകന്‍ ഫൈസല്‍ (17) ആണ് മരിച്ചത്. ഒപ്പം ഉണ്ടായിരുന്ന സെയ്ദലി(16)യ്ക്കാണ് പരിക്കേറ്റത്.
ഇന്നലെ വൈകിട്ട് നാലരയോടെ മൈലാപ്പൂര് ലയാ മില്‍ക്കിന് സമീപത്തായിരുന്നു അപകടം. മൈലാപ്പൂര് എകെഎം ഹയര്‍ സെക്കന്ററി സ്‌കൂളിലെ പ്ലസ് വണ്‍ വിദ്യാര്‍ത്ഥികളാണ് അപകടത്തില്‍പെട്ട വിദ്യാര്‍ത്ഥികള്‍. സ്‌കൂളില്‍ പോയ ശേഷം സ്‌കൂട്ടറില്‍ വരവെയായിരുന്നു നിയന്ത്രണം വിട്ട സ്‌കൂട്ടര്‍ ലോറിക്ക് പിന്നിലിടിച്ചത്. അപകടത്തില്‍പ്പെട്ടവരെ ഉടന്‍ തന്നെ പാലത്തറയിലെ സഹകരണ ആശുപത്രിയില്‍ എത്തിച്ചെങ്കിലും ഫൈസലിന്റെ ജീവന്‍ രക്ഷിക്കാനായില്ല. കൊട്ടിയം പോലീസ് മേല്‍നടപടികള്‍ സ്വീകരിച്ചു. ഫൈസലിന്റെ സഹോദരി: ഫാത്തിമ.

കൊല്ലം: പശ്ചിമ ബംഗാള്‍ സ്വദേശിയായ യുവതിയെ കൊലപ്പെടുത്തിയ കേസില്‍ ബംഗാളി യുവാവിന് ജീവപര്യന്തം കഠിന തടവും ഒരു ലക്ഷം രൂപ പിഴയും ശിക്ഷ. ബംഗാള്‍ സ്വദേശി സബൂജ് കുമാര്‍ ബിശ്വാസ്ി (34)നെയാണ് അഡീഷണല്‍ സെഷന്‍സ് ജഡ്ജ് ബിന്ദു സുധാകരന്‍ ശിക്ഷിച്ചത്. 2015 ഒക്ടോബര്‍ 12നാണ് കേസിനാസ്പദമായ സംഭവം നടന്നത്. വിവാഹിതയും ഒരു കുട്ടിയുടെ മാതാവുമായ യുവതി പശ്ചിമ ബംഗാളില്‍ ഭര്‍ത്താവുമൊത്ത് താമസിച്ചു വരവേ പ്രതിയുമായി സ്നേഹത്തിലാവുകയും, ഒളിച്ചോടി കൊല്ലം ചാത്തന്നൂരില്‍ താമസിച്ച് വരികയുമായിരുന്നു. ഇതിനിടെ യുവതി മറ്റൊരു ബംഗാളി സ്വദേശിയായ യുവാവുമായി സ്നേഹത്തിലായി. ഇത് പ്രതി അറിയുകയും യുവതിയെ താമസസ്ഥലത്ത് വെച്ച് കഴുത്ത് ഞെരിച്ച് കൊലപ്പെടുത്തുകയുമായിരുന്നു. കൊലപാതകത്തിന് ശേഷം പ്രതി പശ്ചിമ ബംഗാളിലേക്ക് രക്ഷപ്പെട്ടിരുന്നു. തുടര്‍ന്ന് അന്വേഷണ സംഘം പശ്ചിമ ബംഗാളിലെത്തിയാണ് ഇയാളെ അറസ്റ്റ് ചെയ്തത്.
ചാത്തന്നൂര്‍ പോലീസാണ് കേസ് അന്വേഷിച്ച് കുറ്റപത്രം സമര്‍പ്പിച്ചത്. ദൃക്സാക്ഷികള്‍ ഇല്ലാത്ത കേസില്‍ സാഹചര്യ തെളിവുകളുടേയും ശാസ്ത്രീയ തെളിവുകളുടേയും അടിസ്ഥാനത്തിലാണ് പ്രതിയെ ശിക്ഷിച്ചത്. ബംഗാളി സ്വദേശികളായ നാല് പേരും കോടതിയില്‍ പ്രോസിക്യൂഷന് അനുകൂലമായി മൊഴി നല്‍കിയിരുന്നു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര്‍ അഡ്വ. ജയ കമലാസനന്‍ ഹാജരായി.