ചൂട് വര്‍ധിച്ചുവരുന്ന സാഹചര്യത്തില്‍ എയര്‍കണ്ടീഷനറുകള്‍ ഉപയോഗിക്കുന്നവരുടെ എണ്ണത്തിലും വലിയ വര്‍ധനയാണുണ്ടായിരിക്കുന്നത്. പണ്ടൊക്കെ വീട്ടില്‍ എസി വെക്കുക എന്നത് ആര്‍ഭാടത്തിന്റെ അടയാളമായിരുന്നു. എന്നാലിന്ന് ചൂട് സഹിക്കാന്‍ വയ്യാതായതോടെയാണ് പല വീടുകളിലും എസി സ്ഥാപിച്ചുതുടങ്ങിയത്. വീട്ടിലേക്ക് എസി വാങ്ങുമ്പോളും ഒരുപാട് കാര്യങ്ങള്‍ ശ്രദ്ധിക്കണം.
സ്റ്റാര്‍ നോക്കി വാങ്ങാം
കുറഞ്ഞ ഊര്‍ജ ക്ഷമത റേറ്റിംഗോ കുറഞ്ഞ സ്റ്റാറോ ഉള്ള എസികള്‍ താരതമ്യേന വില കുറഞ്ഞതായിരിക്കാം, എന്നാല്‍ സ്റ്റാര്‍ കൂടുന്നതിനനുസരിച്ച് വൈദ്യുതി ഉപഭോഗം കുറയും. വൈദ്യുതി ബില്ല് കൂടുമെന്ന കാര്യത്തില്‍ നിങ്ങള്‍ വിഷമിക്കേണ്ടതുമില്ല. 5 സ്റ്റാര്‍ ഉള്ള എ.സിക്കായിരിക്കും കൂടുതല്‍ കാര്യക്ഷതയുണ്ടാകുന്നത്. അധികം തുക മുടക്കി എ.സി വാങ്ങിയെന്ന് വിഷമം വേണ്ട. ചെലവ് കുറഞ്ഞ എസി വാങ്ങിയാല്‍ വൈദ്യുതി ബില്ലില്‍ അതിന്റെ ഇരട്ടി നല്‍കേണ്ടിവരും. കുറഞ്ഞത് 3 സ്റ്റാര്‍ റേറ്റിംഗുള്ള എസി വാങ്ങാന്‍ ശ്രമിക്കുക.
കോപ്പര്‍ കോയിലുകളുള്ള എസി
പുതിയ എസി വാങ്ങാന്‍ പോകുന്നവര്‍ കോപ്പര്‍ കണ്ടന്‍സറുള്ള എ.സി തെരഞ്ഞെടുക്കാം. അലൂമിനിയം കോയിലുകളുള്ള എസികളെ അപേക്ഷിച്ച് കോപ്പര്‍ കോയിലുകളുള്ള എസികള്‍ നല്ല തണുപ്പ് നല്‍കും. കോപ്പര്‍ കോയിലുകളുള്ള എസിക ള്‍ കൂടുതല്‍കാലം ഈടുനില്‍ക്കുന്നതും പരിപാലിക്കാന്‍ എളുപ്പവുമാണ്.അലോയ് കോയിലുള്ള എ.സികള്‍ എളുപ്പത്തില്‍ കേട് വരാനുള്ള സാധ്യതയും കൂടുതലാണ്.
മുറിയുടെ വലിപ്പം അടിസ്ഥാനമാക്കി എസിയുടെ കപ്പാസിറ്റി തീരുമാനിക്കുക
എപ്പോഴും മുറിയുടെ വലുപ്പത്തിന് അനുസരിച്ച് എസിയുടെ ടണ്‍ കപ്പാസിറ്റി തീരുമാനിക്കുക. 140-150 ചതുരശ്ര അടി വിസ്തീര്‍ണ്ണമുള്ള ഒരു മുറിക്ക് 1-ടണ്‍ അല്ലെങ്കില്‍ 1.5-ടണ്‍ എസി മതിയാകും. വലിയ മുറിയിലേക്കാണ് നിങ്ങള്‍ എസി വാങ്ങുന്നതെങ്കില്‍ അതില്‍കൂടുതല്‍ കപ്പാസിറ്റിയുള്ള എസി വാങ്ങുക.
സ്പ്ലിറ്റ് അല്ലെങ്കില്‍ വിന്‍ഡോ എസി
വിന്‍ഡോ എസികള്‍ താരതമ്യേന വിലകുറഞ്ഞതും പരിപാലിക്കാന്‍ എളുപ്പവുമാണ്. അതിനാല്‍ നിങ്ങളുടെ മുറിയുടെ ചുമരിനോട് ചേര്‍ന്ന് ജനലോ ഷാഫ്റ്റോ ഉണ്ടെങ്കില്‍, വിന്‍ഡോ എസി വാങ്ങാം. സ്പ്ലിറ്റ് എസികളാണെങ്കില്‍ ചെലവേറിയതാണെങ്കിലും ടണ്‍ കണക്കിന് ഫീച്ചറുകള്‍ വാഗ്ദാനം ചെയ്യുന്നു. എസിക്ക് വേണ്ടി മുറിക്കുള്ളില്‍ കൂടുതല്‍ സ്ഥലം ആവശ്യമില്ല ആവശ്യമില്ല.
സ്മാര്‍ട്ട് ഫീച്ചറുകള്‍ വേണമെങ്കില്‍ മാത്രം
മിക്ക കമ്പനികളും ഇപ്പോള്‍ എസികളില്‍ നിരവധി സ്മാര്‍ട്ട് ഫീച്ചറുകള്‍ വാഗ്ദാനം ചെയ്യുന്നുണ്ട്. എസിയുടെ പ്രവര്‍ത്തനങ്ങള്‍ സ്മാര്‍ട്ട്ഫോണും വോയ്സ് അസിസ്റ്റന്റും ഉപയോഗിച്ച് നിയന്ത്രിക്കാനടക്കമുള്ള ഫീച്ചറുകള്‍ നിലവിലുണ്ട്. എന്നാല്‍ അതിനനുസരിച്ച് വിലയും കൂടും. അതുകൊണ്ട് തന്നെ നിങ്ങള്‍ക്ക് ആവശ്യമുണ്ടെങ്കില്‍ മാത്രം ഇത്തരം സ്മാര്‍ട്ട് ഫീച്ചറുകളുള്ള എസികള്‍ തെരഞ്ഞെടുത്താല്‍ മതി.
