ലോസാഞ്ചല്സ്: മലയാള സിനിമയ്ക്ക് മറ്റൊരു ചരിത്ര നിമിഷം കൂടി. മമ്മൂട്ടി നായകനായ വിസ്മയ ചിത്രം ‘ഭ്രമയുഗം’ നാളെ ലോസാഞ്ചല്സിലെ പ്രശസ്തമായ ഓസ്കര് അക്കാദമി മ്യൂസിയത്തില് പ്രദര്ശിപ്പിക്കും.
അക്കാദമി മ്യൂസിയത്തിന്റെ ‘വേര് ദി ഫോറസ്റ്റ് മീറ്റ്സ് ദി സീ’ എന്ന പ്രത്യേക ചലച്ചിത്ര പരമ്പരയില് പ്രദര്ശിപ്പിക്കുന്ന ഏക ഇന്ത്യന് ചിത്രമാണ് ഭ്രമയുഗം. ഫോക്ലോര്, മിത്ത്, ഹൊറര് വിഭാഗങ്ങളില്പ്പെട്ട ലോക സിനിമകളെ പരിചയപ്പെടുത്തുന്ന പരമ്പരയുടെ ഭാഗമായാണ് രാഹുല് സദാശിവന് സംവിധാനം ചെയ്ത ഈ ചിത്രം തിരഞ്ഞെടുക്കപ്പെട്ടത്.
ഓസ്കര് അക്കാദമി മ്യൂസിയത്തില് പ്രദര്ശിപ്പിക്കപ്പെടുന്ന ആദ്യ മമ്മൂട്ടി ചിത്രം എന്ന സവിശേഷതയും ഇതിനുണ്ട്. നാളെ ലോസാഞ്ചല്സ് സമയം വൈകുന്നേരം നടക്കുന്ന പ്രദര്ശനത്തിനായി സിനിമാ ലോകം ആവേശത്തോടെയാണ് കാത്തിരിക്കുന്നത്.
ദേശീയ പുരസ്കാര പട്ടികയില് നിന്ന് ചിത്രം ഒഴിവാക്കപ്പെട്ടതില് വലിയ പ്രതിഷേധങ്ങള് ഉയര്ന്നിരുന്ന പശ്ചാത്തലത്തില്, ഈ അന്താരാഷ്ട്ര അംഗീകാരം മലയാള സിനിമയുടെ കരുത്തുറ്റ സാന്നിധ്യമായി വിലയിരുത്തപ്പെടുന്നു.
മമ്മൂട്ടിയുടെ ‘കൊടുമണ് പോറ്റി’ എന്ന കഥാപാത്രം ആഗോള സിനിമ പ്രേക്ഷകര്ക്കിടയില് ചര്ച്ചയാകാന് ഈ സ്ക്രീനിംഗ് വഴിതുറക്കും. ചിത്രത്തിന്റെ സംവിധായകന് രാഹുല് സദാശിവനും മമ്മൂട്ടിയും ഈ അഭിമാന നിമിഷം സോഷ്യല് മീഡിയയിലൂടെ ആരാധകരുമായി പങ്കുവെച്ചിട്ടുണ്ട്.
അര്ജുന് അശോകന്, സിദ്ധാര്ത്ഥ് ഭരതന്, അമല്ഡ ലിസ് തുടങ്ങിയവരും പ്രധാന വേഷങ്ങളിലെത്തിയ ചിത്രം ബ്ലാക്ക് ആന്ഡ് വൈറ്റ് ഫോര്മാറ്റിലാണ് ഒരുക്കിയത്. സ്ക്രീനിംഗിന്റെ ഭാഗമായി പുറത്തിറങ്ങിയ ടീസര് വീഡിയോയില് ഭ്രമയുഗത്തിലെ ദൃശ്യങ്ങളും അക്കാദമി മ്യൂസിയം ഉള്പ്പെടുത്തിയിട്ടുണ്ട്.
