മലയാളത്തിലെ എക്കാലത്തെയും മികച്ച സിനിമകളില് മുന്പന്തിയില് തന്നെയാണ് 1998ല് പുറത്തിറങ്ങിയ സിബി മലയില് സംവിധാനം ചെയ്ത സമ്മര് ഇന് ബത്ലഹേം എന്ന ചിത്രം. ചിത്രത്തില് സുരേഷ് ഗോപി, ജയറാം, മഞ്ജു വാര്യര്, കലാഭവന് മണി തുടങ്ങിയ പ്രേക്ഷകരുടെ ഇഷ്ട താരങ്ങളാണ് അണിനിരന്നത്. സമ്മര് ഇന് ബത്ലഹേമിലെ ഡെന്നിസിനെയും രവിശങ്കറിനെയും മോനായിയെയും അഭിരാമി(ആമി)യെയും നിരഞ്ജനെയും അത്ര പെട്ടെന്ന് മലയാളികള്ക്ക് മറക്കാനാവില്ല. ചിത്രത്തില് മോഹന്ലാല് അതിഥിവേഷത്തിലും എത്തിയിരുന്നു. നിരഞ്ജന് എന്ന മോഹന്ലാല് കഥാപാത്രം ഇന്നും മലയാള സിനിമയിലെ എക്കാലത്തെയും മികച്ച അതിഥി വേഷങ്ങളിലൊന്നായാണ് വിലയിരുത്തപ്പെടുന്നത്. ഇപ്പോള് സിനിമ ഇറങ്ങി 27-ാം വര്ഷത്തിലേക്ക് കടക്കുമ്പോള് ചിത്രത്തിന്റെ രണ്ടാം ഭാഗം ഒരുങ്ങുന്നുവെന്ന വാര്ത്തയാണ് പുറത്തുവരുന്നത്.
‘ആരാണ് പൂച്ചയ്ക്ക് മണി കെട്ടിയത് കൂടുതല് സര്പ്രൈസുകള്ക്കായി കാത്തിരിക്കുക’ എന്ന കുറിപ്പോടെയാണ് സിബി മലയിലിന്റെ പ്രഖ്യാപനം. സിബി മലയില് തന്നെ സംവിധാനം ചെയ്യുന്ന രണ്ടാം ഭാഗത്തിന്റെ രചന രഞ്ജിത്താണ്. സിയാദ് കോക്കറാണ് നിര്മ്മാണം. മഞ്ജു വാര്യരും ജയസൂര്യയും പ്രധാന വേഷത്തിലെത്തിയ മേരി ആവാസ് സുനോ എന്ന ചിത്രത്തിന്റെ ഓഡിയോ ലോഞ്ചില് വെച്ച് സമ്മര് ഇന് ബത്ലേഹിമിന്റെ നിര്മാതാവായ സിയാദ് കോക്കര് ചിത്രത്തിന്റെ രണ്ടാം ഭാഗം പ്രഖ്യാപിച്ചിരുന്നു. സമ്മര് ഇന് ബത്ലഹേം രണ്ടാം ഭാഗത്തില് മഞ്ജു വാര്യര് ഉണ്ടായിരിക്കുമെന്നും മഞ്ജുവും താനും ഒരു കുടുംബം പോലെയാണെന്നും അദ്ദേഹം പറഞ്ഞിരുന്നു.
ഹരികൃഷ്ണന്സിനൊപ്പമായിരുന്നു ചിത്രത്തിന്റെ റിലീസ്. ആ വര്ഷം പുറത്തിറങ്ങിയ മലയാള ചിത്രങ്ങളില് ഏറ്റവും കൂടുതല് കളക്ഷന് നേടിയ രണ്ടാമത്തെ ചിത്രം കൂടിയായിരുന്നു സമ്മര് ഇന് ബത്ലഹേം. സഞ്ജീവ് ശങ്കര് ആണ് ചിത്രത്തിന് ഛായാഗ്രഹണമൊരുക്കിയിരിക്കുന്നത്. സിനിമയുടെ അവസാന ഭാഗത്ത് ജയറാമിന് പൂച്ചയെ അയച്ചത് ആരാണെന്നുള്ള ചോദ്യം അവ്യക്തമാക്കിയാണ് ചിത്രം അവസാനിച്ചത്. സിനിമ ഇറങ്ങിയത് മുതല് രണ്ടാം ഭാഗമെത്തുമോ എന്ന ചോദ്യം പ്രേക്ഷകര് ചോദിച്ചിരുന്നു.
