സോഷ്യൽ മീഡിയയിൽ എപ്പോഴും വ്യത്യസ്തമായ ട്രെൻഡുകൾക്ക് പഞ്ഞമില്ല. ഒരു ബിരിയാണി മുഴുവൻ കഴിച്ചാൽ ആയിരം രൂപ, 30 സെക്കൻഡ് കൊണ്ട് സൗജന്യ പെട്രോൾ – ഇത്തരം വിചിത്ര വെല്ലുവിളികളുമായി ഇൻഫ്ലുവൻസർമാർ ആളുകളെ തേടിയെത്തുന്നത് പതിവാണ്. എന്നാൽ ഇപ്പോൾ വൈറലായിരിക്കുന്നത് ഒരു വിദേശ ഇൻഫ്ലുവൻസറുടെ അപ്രതീക്ഷിത ചോദ്യവും ഒരു സാധാരണക്കാരൻ നൽകിയ അതിശയകരമായ മറുപടിയുമാണ്!
പ്രശസ്ത വിദേശ ഇൻഫ്ലുവൻസറായ റൂബി ഹെക്സ്, സൈക്കിളിൽ ഇരിക്കുകയായിരുന്ന ഹരിയാൻവി എന്ന യുവാവിനെ സമീപിച്ചാണ് ഈ വെല്ലുവിളി നടത്തിയത്. “നിനക്ക് 8,500 രൂപ വേണോ അതോ എന്നോടൊപ്പം ഡേറ്റിന് വരണോ?” എന്നായിരുന്നു റൂബിയുടെ ചോദ്യം. സാധാരണ ഇത്തരം സന്ദർഭങ്ങളിൽ ആളുകൾ പണമാണ് തിരഞ്ഞെടുക്കാറുള്ളത്. എന്നാൽ ഹരിയാൻവിയുടെ പ്രതികരണം ആരെയും ഞെട്ടിക്കുന്നതായിരുന്നു.
ചോദ്യം കേട്ട ഉടൻ യുവാവ് തന്റെ സഹോദരനെ വിളിച്ചു. “ഒരു പെൺകുട്ടി 100 ഡോളർ (ഏകദേശം 8,500 രൂപ) വേണോ അതോ അവളുമായി ഒരു ഡേറ്റിന് പോകണോ എന്ന് ചോദിക്കുന്നു. ഞാൻ എന്ത് തിരഞ്ഞെടുക്കണം?” – ഹരിയാൻവി സഹോദരനോട് ചോദിച്ചു.
സഹോദരനുമായുള്ള സംഭാഷണത്തിനു ശേഷം ഹരിയാൻവി നൽകിയ മറുപടിയാണ് എല്ലാവരെയും അക്ഷരാർത്ഥത്തിൽ സ്തബ്ധരാക്കിയത്. “രണ്ടും വേണ്ട!” അയാൾ ഉറച്ച സ്വരത്തിൽ പറഞ്ഞു. ഇത് കേട്ടതും റൂബി ഹെക്സ് അമ്പരന്നുപോയി. ഇതുവരെ ആരും തന്നോട് ഇങ്ങനെയൊരു മറുപടി പറഞ്ഞിട്ടില്ലെന്ന് അവർ വിശ്വസിക്കാനാവാതെ പറഞ്ഞു.
അരക്കോടിയിലധികം ആളുകളാണ് ഈ വീഡിയോ ഇതിനോടകം കണ്ടിരിക്കുന്നത്. ധനമോഹമില്ലാതെ, സ്വന്തം നിലപാടിൽ ഉറച്ചുനിന്ന ഹരിയാൻവിയെ അഭിനന്ദിച്ച് നിരവധി പേരാണ് കമന്റുകളുമായി എത്തുന്നത്. സമൂഹമാധ്യമങ്ങളിൽ ഇപ്പോൾ താരമാണ് ഈ ഹരിയാൻവി യുവാവ്!
