ദൈവങ്ങളുടെ വിഗ്രഹങ്ങള്ക്ക് പകരം അന്യഗ്രഹജീവിക്കായി പൂര്ണമായി സമര്പ്പിച്ചിരിക്കുന്ന ഒരു ക്ഷേത്രത്തിമുണ്ട് ഇന്ത്യയില്. തമിഴ്നാട്ടിലെ സേലത്താണ് അത്തരമൊരു ക്ഷേത്രമുള്ളത്. സാധാരണ ക്ഷേത്രങ്ങളില് നിന്നും തികച്ചും വ്യത്യസ്തമാണ് ഈ ആരാധനാലയം. പരമ്പരാഗതമായ വിഗ്രഹങ്ങള്ക്ക് പകരം കറുത്ത അന്യഗ്രഹജീവിയുടെ പ്രതിമയാണ് ഇവിടെ പ്രതിഷ്ഠിച്ചിരിക്കുന്നത്.
സേലം മല്ലംമൂപ്പാംപെട്ടിയിലെ രാമഗൗണ്ടനൂര് സ്വദേശിയായ ലോകനാഥനാണ് ഈ ക്ഷേത്രം നിര്മ്മിച്ചത്. താന് കണ്ട സ്വപ്നത്തില് അന്യഗ്രഹജീവിയായ ദൈവത്തെ കണ്ടതാണ് ക്ഷേത്രം പണിയാന് പ്രചോദനമായതെന്നും അദ്ദേഹം പറയുന്നു. ഭൂമിക്കടിയില് 11 അടി താഴ്ചയിലാണ് ക്ഷേത്രം നിര്മ്മിച്ചിരിക്കുന്നത്. അന്യഗ്രഹ ജീവിയുടെ ഈ കറുത്ത പ്രതിമയെയാണ് ലോകനാഥന് ദിവസവും ആരാധിക്കുന്നതും പ്രാര്ത്ഥിക്കുകയും ചെയ്യുന്നത്.ഈ അന്യഗ്രഹജീവിയാണ് പരമശിവന് സൃഷ്ടിച്ച ആദ്യത്തെ ദൈവമെന്നും, പ്രകൃതിദുരന്തങ്ങളില് നിന്നും ലോകത്തെ സംരക്ഷിക്കാന് ഇതിന് വലിയ ശക്തിയുണ്ടെന്നും ലോകനാഥന് വിശ്വസിക്കുന്നു. താന് അന്യഗ്രഹജീവികളുമായി സംസാരിച്ചിട്ടുണ്ടെന്നും, ലോകത്തെ സംരക്ഷിക്കാന് അവര് സഹായിക്കുമെന്ന് ഉറപ്പു നല്കിയിട്ടുണ്ടെന്നും അദ്ദേഹം അവകാശപ്പെടുന്നു.പത്താം ക്ലാസ് വരെ മാത്രം പഠിച്ച ലോകനാഥന് കുറച്ച് വര്ഷങ്ങള്ക്ക് മുമ്പ് ഒരു കഫേ നടത്തിയിരുന്നു. കാല് വേദനയ്ക്ക് ചികിത്സ തേടുന്നതിനിടെ സിദ്ധര്ഭാഗ്യ എന്ന വ്യക്തിയെ കണ്ടുമുട്ടി ശിഷ്യനായി. പിന്നീട് ഗുരുനാഥന് എന്ന മറ്റൊരു ഉപദേശകന്റെ നിര്ദ്ദേശപ്രകാരമാണ് ക്ഷേത്ര നിര്മ്മാണം ആരംഭിച്ചത്. പുരാതന സിദ്ധ താളിയോല ഗ്രന്ഥങ്ങളില് അന്യഗ്രഹജീവികളെക്കുറിച്ച് പരാമര്ശിക്കുന്നുണ്ടെന്നും ഭാവിയില് ആളുകള് അവരെ ആരാധിക്കുമെന്നും ലോകനാഥന് വിശ്വസിക്കുന്നു.ക്ഷേത്ര നിര്മ്മാണത്തിനായി അദ്ദേഹം സംഭാവനകളൊന്നും സ്വീകരിച്ചിട്ടില്ല, ശിഷ്യന്മാരുടെ സഹായത്തോടെയാണ് നിര്മ്മാണം പൂര്ത്തിയാക്കിയത്. ക്ഷേത്രത്തിന്റെ വീഡിയോയും ചിത്രങ്ങളും സമൂഹമാദ്ധ്യമങ്ങളില് പ്രചരിച്ചതോടെ നിരവധി പേരുടെ ശ്രദ്ധയാണ് ആകര്ഷിച്ചത്. ഇത്തരത്തിലൊരു അസാധാരണമായ ആശയം കണ്ട് സോഷ്യല് മീഡിയ ഉപയോക്താക്കള് അത്ഭുതവും തമാശയും കലര്ന്ന പ്രതികരണങ്ങളാണ് നല്കുന്നത്.
