ദിനം പ്രതി ചൂട് വര്ദ്ധിക്കുകയാണ്. അസഹ്യമായ ചൂടില് നിന്ന് രക്ഷ നേടാനും ആരോഗ്യപ്രശ്നങ്ങളെ പ്രതിരോധിക്കാനും ജീവിതശൈലിയില് ചെറിയ മാറ്റങ്ങള് വരുത്തേണ്ടത് അനിവാര്യമാണ്. അതില് സുപ്രധാനം ആഹാരക്രമത്തില് വരുത്തേണ്ട മാറ്റങ്ങളാണ്. ദഹിക്കാന് എളുപ്പമുളള ലഘുവായ ആഹാരങ്ങള് കഴിക്കുകയെന്നതുപോലെ തന്നെ പ്രധാനമാണ് ധാരാളം വെള്ളം കുടിക്കുകയെന്നത്.
ചൂടിനെ തുരത്താന് ഇവ കുടിക്കാം
ചൂടിനെ നേരിടാനും ശരീരം തണുപ്പിക്കാനും ക്ഷീണവും തളര്ച്ചയും അകറ്റാനും പല തരത്തിലുള്ള പാനീയങ്ങള് നാം തയ്യാറാക്കാറുണ്ട്. മണ്പാത്രത്തില് സൂക്ഷിച്ച വെള്ളം കുടിക്കുന്നത് ചൂടുകാലത്ത് അത്യുത്തമമാണ്. നന്നാറി, കൊത്ത മല്ലി, കരിങ്ങാലി, രാമച്ചം എന്നിവയിട്ട് തിളപ്പിച്ച വെള്ളം കുടിക്കാന് ഉപയോഗിക്കാം. നേര്പ്പിച്ച പാല്, കഞ്ഞി വെള്ളം, ഫ്രൂട്ട് ജ്യൂസുകള് എന്നിവയും ഫലപ്രദമാണ്.
ആപ്പിള്, ഓറഞ്ച്, തണ്ണിമത്തന്, മുന്തിരി, മാമ്പഴം, നാരങ്ങ, മാതളം തുടങ്ങിയ പഴവര്ഗങ്ങളും അവയുടെ ജ്യൂസുകളും ആരോഗ്യദായകമാണ്. എളുപ്പത്തില് ഉണ്ടാക്കാവുന്ന നാരങ്ങവെള്ളം വളരെ ഗുണകരമാണ്. നാരങ്ങാവെള്ളത്തില് ഒരുനുള്ള് ഉപ്പുകൂടി ചേര്ത്തു കുടിച്ചാല് ലവണ നഷ്ടം തടയാനും പേശികളുടെ കോച്ചിവലിച്ചില്, പേശിവേദന തുടങ്ങിയ ആരോഗ്യപ്രശ്നങ്ങള് ഒഴിവാക്കാനും സാധിക്കും.
സംഭാരമാണ് ചൂടിനെ നേരിടാന് ഫലപ്രദമായ മറ്റൊരു പാനീയം. വെള്ളം ചേര്ത്ത് നേര്പ്പിച്ച തൈരില് പച്ചമുളക്, ഇഞ്ചി, കറിവേപ്പില ഇവ ചതച്ചുചേര്ത്താല് രുചികരവും ആരോഗ്യപ്രദവുമായിരിക്കും. ദാഹമകറ്റാന് പ്രകൃതി കനിഞ്ഞു നല്കുന്ന മായമില്ലാത്ത പാനീയമാണ് കരിക്കിന്വെള്ളം. ദാഹമകറ്റാന് മാത്രമല്ല, ശരീരത്തിന് ഗുണകരമായ ധാരാളം ഘടകങ്ങളും ഇതില് നിന്ന് കിട്ടും. കരിക്കിന് വെള്ളത്തില് പൈനാപ്പിള്, തണ്ണിമത്തന് എന്നിവ ചേര്ത്തുണ്ടാക്കുന്ന പാനീയങ്ങളും ശരീരം തണുപ്പിക്കാന് ഉപകരിക്കും.
ഒഴിവാക്കേണ്ട പാനീയങ്ങള്
വേനല്ച്ചൂടിനെ മറികടക്കാന് വെള്ളം അനിവാര്യമണെങ്കിലും ചില പാനീയങ്ങള് ഒഴിവാക്കേണ്ടതായുമുണ്ട്. സോഡ അടങ്ങിയ ശീതള പാനീയങ്ങളാണ് അതില് പ്രധാനം. കൃത്രിമ ശീതളപാനീയത്തില് ആവശ്യത്തിനുള്ള ഒരു പോഷകവുമില്ല. ഇവയിലുള്ള അമിത മധുരവും ഊര്ജവും പൊണ്ണത്തടിക്ക് കാരണമാവുകയും ചെയ്യുന്നു. ശരീരത്തിലെ ഷുഗര് ലെവല് കൂടാനും കുറയാനും കാരണമാകുന്നതിനാല് ഇത്തരം പാനീയങ്ങള് കൂടുതല് ക്ഷീണം തോന്നിപ്പിക്കുകയും ചെയ്യും.
ചായ, കാപ്പി എന്നിവയുടെ അമിത ഉപയോഗം കുറയ്ക്കുന്നതാണ് വേനല്ക്കാലത്ത് നല്ലത്. ഉപ്പ് ചേര്ത്ത പാനീയങ്ങളുടെ അമിത ഉപയോഗവും ദോഷം ചെയ്യും. മദ്യവും മറ്റു ലഹരി പദാര്ഥങ്ങളും ഒഴിവാക്കേണ്ടവയാണ്. കൂടാതെ, കുപ്പിവെള്ളം പരമാവധി ഒഴിവാക്കി ശുദ്ധമായ വെള്ളം ഉപയോഗിക്കാന് പ്രത്യേകം ശ്രദ്ധിക്കേണ്ടതാണ്. അധികം ചൂടോ തണുപ്പോ ഇല്ലാത്ത വെള്ളം കുടിക്കുന്നതാണ് ഗുണകരം.