മുംബൈ: നീറ്റ് പരീക്ഷയില് ഉന്നത വിജയം നേടിയ വിദ്യാര്ഥി ജീവനൊടുക്കി. മഹാരാഷ്ട്രയിലെ ചന്ദ്രപൂര് സ്വദേശി അനുരാഗ് അനില് വോര്ക്കറാണ് ആത്മഹത്യ ചെയ്തത്. ഡോക്ടറാകാന് ആഗ്രഹമില്ലെന്ന് ആത്മഹത്യാക്കുറിപ്പില് പറയുന്നുണ്ട്.
നീറ്റ് പരീക്ഷയില് 99.99 മാര്ക്ക് നേടിയ അനുരാഗിന് 1475-ാം റാങ്ക് ആയിരുന്നു. എംബിബിസ് പഠനത്തിനായി ഉത്തര്പ്രദേശിലെ ഗൊരഖ്പൂരിലേക്ക് തിരിക്കാനിരിക്കെയാണ് അനുരാഗിന്റെ മരണം. യാത്രക്കായി കുടുംബം എല്ലാ ഒരുക്കങ്ങളും പൂര്ത്തിയാക്കിയിരുന്നു. അതിനിടെയാണ് അനുരാഗിനെ വീടിനുള്ളില് തൂങ്ങി മരിച്ച നിലയില് കണ്ടെത്തിയത്.
ആത്മഹത്യാക്കുറിപ്പിലെ കൂടുതല് വിവരങ്ങള് പൊലീസ് വെളിപ്പെടുത്തിയിട്ടില്ല. നിര്ബന്ധത്തിന് വഴങ്ങിയാണ് അനുരാഗ് നീറ്റ് പരീക്ഷയെഴുതിയത് എന്നാണ് പുറത്തുവരുന്ന സൂചന. ഇതിലുള്ള മാനസിക സംഘര്ഷമാണ് ആത്മഹത്യക്ക് കാരണമെന്നാണ് ദേശീയ മാധ്യമങ്ങള് റിപ്പോര്ട്ട് ചെയ്യുന്നത്. സംഭവത്തില് പൊലീസ് കേസ് രജിസ്റ്റര് ചെയ്ത് അന്വേഷണം ആരംഭിച്ചു.
