ശബരിമല ശ്രീകോവിലിലെ ദ്വാരപാലക ശില്പങ്ങളില്നിന്നും സ്വര്ണം മോഷ്ടിച്ചു എന്ന കേസില് ദേവസ്വം ബോര്ഡ് മുന് പ്രസിഡന്റ് എ. പത്മകുമാറിനു ജാമ്യമില്ല. കൊല്ലം വിജിലന്സ് കോടതിയാണ് പത്മകുമാറിന്റെ ജാമ്യാപേക്ഷ തള്ളിയത്. ദേവസ്വം പ്രസിഡന്റ് എന്ന രീതിയില് ഒപ്പുവയ്ക്കുക മാത്രമാണ് താന് ചെയ്തതെന്നും മറ്റ് അംഗങ്ങള്ക്കുള്ള ഉത്തരവാദിത്തം മാത്രമേ തനിക്കും ഉള്ളുവെന്നുമാണ് കോടതിയില് പത്മകുമാര് ഉന്നയിച്ച വാദം. എന്നാല് ഇതു കോടതി തള്ളി. ദേവസ്വം പ്രസിഡന്റ് എന്ന തരത്തില് ഒഴിഞ്ഞുമാറാന് പത്മകുമാറിനു കഴിയില്ലെന്നും ജാമ്യം അനുവദിക്കാന് കഴിയില്ലെന്നും കോടതി പറഞ്ഞു. പത്മകുമാറിനു കേസിലുള്ള പങ്ക് തെളിയിക്കുന്ന രേഖകളും അന്വേഷണ സംഘം കൊല്ലം വിജിലന്സ് കോടതിയില് ഹാജരാക്കിയിരുന്നു. കഴിഞ്ഞ ദിവസം എസ്ഐടി ഹൈക്കോടതിയില് സമര്പ്പിച്ച റിപ്പോര്ട്ടിലും പത്മകുമാറിനെതിരെ ഗുരുതര പരാമര്ശമാണുണ്ടായിരുന്നത്.
ശബരിമല ശ്രീകോവിലിലെ കട്ടിളപ്പാളികള് സ്വര്ണം പൊതിഞ്ഞതാണെന്നു കൃത്യമായ അറിവുണ്ടായിട്ടും തിരുവിതാംകൂര് ദേവസ്വം ബോര്ഡ് പ്രസിഡന്റായിരുന്ന പത്മകുമാര് ബോര്ഡ് നോട്ട് തിരുത്തിയെന്നാണ് എസ്ഐടി ഹൈക്കോടതിയില് അറിയിച്ചത്. സ്വര്ണം പൊതിഞ്ഞ ചെമ്പ് പാളികള് എന്ന് എഴുതുന്നതിനു പകരം ചെമ്പ് പാളികള് എന്നെഴുതി. പുറത്തു കൊണ്ടുപോകുന്നതിന് സ്വന്തം കൈപ്പടയില് ‘അനുവദിക്കുന്നു’ എന്നും എഴുതി. മനഃപൂര്വമാണ് വ്യാജമായ വിവരങ്ങള് എഴുതിയത്. ഗുരുതരമായ ഔദ്യോഗിക കൃത്യവിലോപം വഴി പത്മകുമാര് സ്വര്ണക്കൊള്ളയ്ക്കു വഴിവച്ചു. തന്ത്രിയുടെ അഭിപ്രായം തേടിയിട്ടില്ലെന്ന് അന്വേഷണത്തില് വ്യക്തമായെന്നും അറിയിച്ചു.
