2023 മെയ് 10 ബുധൻ
BREAKING NEWS
👉 കൊട്ടാരക്കര താലൂക്ക് ആശുപത്രിയിൽ ചികില്‍സക്കെത്തിച്ച അക്രമി വനിതാ ഡോക്ടറെ കുത്തിക്കൊലപ്പെടുത്തി.
👉അയൽവാസികളും ചേർന്ന് ആശുപത്രിയിലെത്തിച്ച പൂയപ്പള്ളി സ്വദേശി സന്ദീപാണ് അക്രമം കാട്ടിയത്.
👉 ഇയാളെ പരിശോധിച്ച വനിതാ ഡോക്ടർ വന്ദനയെ മേശപ്പുറത്തിരുന്ന കത്രിക ഉപയോഗിച്ച് കഴുത്തിലും, പുറത്തും കുത്തുകയായിരുന്നു.
👉 ഗുരുതരമായി പരിക്കേറ്റ ഡോക്ടറെ തിരുവനന്തപുരത്ത് സ്വകാര്യ ആശുപത്രിയിലേക്ക് മാറ്റിയെങ്കിലും രക്ഷിക്കാനായില്ല
👉ഡോക്ടർമാർ സംസ്ഥാന വ്യാപക സമരത്തിലേക്ക്;കൊല്ലത്ത് പണിമുടക്ക്.
👉 കോഴിക്കോട് കോരപ്പുഴയിൽ ബൈക്കും കാറും കൂട്ടിയിടിച്ച് ബൈക്ക് യാത്രികനായ അതുലും ഒരു വയസ്സുള്ള മകനും മരിച്ചു.
👉 കർണ്ണാടകയിൽ വോട്ടെടുപ്പ് തുടങ്ങി
👉പത്തനംതിട്ട, ഇടുക്കി ജില്ലകളിൽ ഇന്ന് യല്ലോ അലർട്ട്
👉 താനൂർ ദുരന്തത്തിൽ ഡ്രൈവർ കസ്റ്റഡിയിൽ, സഹായി ഇപ്പോഴും ഒളിവിൽ
👉 ഇമ്രാൻ ഖാൻ്റെ അറസ്റ്റ്;പാകിസ്ഥാനിൽ കലാപം രൂക്ഷം, ഇൻ്റർനെറ്റ് ബന്ധം വിച്ഛേദിച്ചു.
👉 റോഡ് ക്യാമറ വിവാദം’ വ്യവസായ സെക്രട്ടറി ഇന്ന് റിപ്പോർട്ട് സമർപ്പിക്കും.
കേരളീയം
🙏ദേശീയ കായിക മത്സരങ്ങളില്‍ പങ്കെടുത്തവര്‍ക്കും 25 മാര്‍ക്ക് ഗ്രേസ് മാര്‍ക്കു നല്‍കാന്‍ വിദ്യാഭ്യാസ വകുപ്പ് തീരുമാനിച്ചു. നേരത്തെ ദേശീയ തലത്തില്‍ മെഡല്‍ നേടിയവര്‍ക്കു മാത്രമായിരുന്നു ഗ്രേസ് മാര്‍ക്ക്.
🙏സംസ്ഥാന യൂത്ത് കോണ്‍ഗ്രസില്‍ തെരഞ്ഞെടുപ്പ് വരുന്നു. ഇന്നു മുതല്‍ മെമ്പര്‍ഷിപ് കാംപെയിന്‍. ഈ മാസം 15 മുതല്‍ നാമനിര്‍ദേശ പത്രിക നല്‍കാം. മത്സരിക്കാനുള്ള പ്രായപരിധി 36 വയസാണ്. സമവായത്തിന് സംസ്ഥാന നേതൃത്വം ശ്രമം തുടരുന്നതിനിടെ ദേശീയ നേതൃത്വമാണ് തെരഞ്ഞെടുപ്പു പ്രഖ്യാപിച്ചത്.
🙏ക്യാമറ പദ്ധതിയിലടക്കം ആരോപണങ്ങള്‍ ഉയര്‍ന്നിരിക്കേ സെക്രട്ടേറിയറ്റില്‍ വ്യവസായ മന്ത്രി പി രാജീവിന്റെ അഡീഷണല്‍ പ്രൈവറ്റ് സെക്രട്ടറി ജി വിനോദിന്റെ ഓഫീസിലുണ്ടായ തീപിടുത്തം ക്രൈംബ്രാഞ്ച് അന്വേഷിക്കും. സംസ്ഥാന പൊലീസ് മേധാവി അനില്‍ കാന്താണ് ഇതു സംബന്ധിച്ച ഉത്തരവിട്ടത്. സംഭവത്തില്‍ കണ്‍ഡോണ്‍മെന്റ് പൊലീസും കേസെടുത്തിട്ടുണ്ട്.
🙏ഗുരുവായൂര്‍ ക്ഷേത്രത്തിലെ മണിക്കിണര്‍ വറ്റിച്ച് വൃത്തിയാക്കുന്നു. ഇതിന്റെ ഭാഗമായി നാളെ മുതല്‍ ദര്‍ശനത്തിനും പ്രസാദ വിതരണത്തിനും നിയന്ത്രണം ഏര്‍പ്പെടുത്തി.
🙏താനൂര്‍ ബോട്ട് ദുരന്തത്തിലെ പ്രതി നാസറിനെ ഒളിവില്‍ പോകാന്‍ സഹായിച്ച മൂന്നു പേര് പിടിയിലായി. താനൂര്‍ സ്വദേശികളായ സലാം, വാഹിദ്, മുഹമ്മദ് ഷാഫി എന്നിവരെയാണ് പിടികൂടിയത്. ബോട്ടുമ നാസറിനെ 14 ദിവസത്തേക്ക് റിമാന്‍ഡ് ചെയ്തു.
🙏താനൂരില്‍ 22 പേരുടെ മരണത്തിനിടയാക്കിയ ബോട്ടപകടത്തില്‍ മന്ത്രിമാരായ വി അബ്ദു റഹ്‌മാനും മുഹമ്മദ് റിയാസിനുമെതിരെ മനുഷ്യക്കുരുതിക്കു കേസെടുക്കണമെന്ന് യൂത്ത് കോണ്‍ഗ്രസ് നേതാവ് രാഹുല്‍ മാങ്കൂട്ടം. ലൈസന്‍സില്ലാത്ത ബോട്ട് സര്‍വീസ് നടത്തുന്നുണ്ടെന്ന് കഴിഞ്ഞ മാസം 23 ന് മന്ത്രിമാരോട് മുഹാജിദ് എന്ന മത്സ്യത്തൊഴിലാളി പരാതിപ്പെട്ടിരുന്നു. പക്ഷേ, മന്ത്രിമാര്‍ നടപടിയെടുത്തില്ലെന്നാണ് ആരോപണം.
🙏ആലപ്പുഴ കൊമ്മാടിയില്‍ റോഡിലെ കുഴിയില്‍ വീണ് മത്സ്യത്തൊഴിലാളി മരിച്ച സംഭവത്തില്‍ ഹൈക്കോടതി ജില്ലാ കലക്ടറോട് റിപ്പോര്‍ട്ടു തേടി. സൈക്കിളില്‍ യാത്ര ചെയ്യവേ, കുഴിയില്‍ വീണ് കളരിക്കല്‍ സ്വദേശി ജോയ് മരിച്ച സംഭവം വിവാദമായിരുന്നു. മുന്നറിയിപ്പ് ബോര്‍ഡ് ഇല്ലാതിരുന്ന സ്ഥലത്ത് അപകടം നടന്നതിനു പിറകേ, മരാമത്ത് വകുപ്പ് അധികൃതര്‍ മുന്നറിയിപ്പു ബോര്‍ഡ് സ്ഥാപിച്ചെന്നാണു നാട്ടുകാരും ബന്ധുക്കളും ആരോപിച്ചിരുന്നത്.
🙏ഈ കേരളത്തില്‍ ജീവിക്കുന്നതിലും ഭേദം തൂങ്ങിച്ചാവുന്നതാണെന്ന നടന്‍ ജഗതി ശ്രീകുമാറിന്റെ മകള്‍ പാര്‍വ്വതി ഷോണിന്റെ വാക്കുകള്‍ സാമൂഹ്യ മാധ്യമങ്ങളില്‍ ശ്രദ്ധേയമായി. താനൂര്‍ ബോട്ടപകട ദുരന്തത്തെത്തുടര്‍ന്നു സാമൂഹ്യ മാധ്യമത്തിലൂടെയാണു പാര്‍വതിയുടെ പ്രതികരണം.
🙏പ്രശസ്ത കൂടിയാട്ടം, ചാക്യാര്‍ക്കൂത്ത് കലാകാരനായ ഒറ്റപ്പാലം ലക്കിടി പടിഞ്ഞാറേ കോച്ചാമ്പിള്ളി മഠത്തില്‍ പി കെ ജി നമ്പ്യാര്‍ അന്തരിച്ചു. ലക്കിടി കുഞ്ചന്‍ നമ്പ്യാര്‍ സ്മാരകം സെക്രട്ടറി ആയിരുന്നു.
🙏ട്രെയിന് യാത്രക്കാരിയോട് അപമര്യാദയായി പെരുമാറിയ ടിക്കറ്റ് എക്‌സാമിനര്‍ അറസ്റ്റില്‍. തിരുവനന്തപുരം സ്വദേശി നിതീഷാണ് പിടിയിലായത്. നിലമ്പൂര്‍ കൊച്ചുവേളി രാജറാണി എക്സ്പ്രസില്‍ ഇന്നലെ പുലര്‍ച്ചെ മദ്യലഹരിയില്‍ അപമര്യാദയായി പെരുമാറിയെന്നാണു കേസ്.
🙏ഭാര്യയെ കുത്തിക്കൊന്നശേഷം ഭര്‍ത്താവ് ട്രെയിന് മുന്നില്‍ ചാടി ജീവനൊടുക്കി. ആലപ്പുഴ കായംകുളത്ത് ചേരാവള്ളി ചക്കാലയില്‍ ലൗലി എന്ന രശ്മിയെയാണ് ഭര്‍ത്താവ് ബിജു കുത്തിക്കൊന്നത്. ചേരാവള്ളി ലെവല്‍ ക്രോസിനു സമീപം ഭര്‍ത്താവ് ബിജു ട്രെയിനിനു മുന്നില്‍ ചാടി ജീവനൊടുക്കി.
🙏കുട്ടംപേരൂര്‍ കുന്നത്തൂര്‍ ശ്രീദുര്‍ഗ്ഗാ ദേവീക്ഷേത്രത്തിലെ ഉത്സവത്തിനിടെ എസ് ഐ പി ടി ബിജുക്കുട്ടന്റെ തലയ്ക്കടിച്ച സംഭവത്തില്‍ പ്രതികളായ മൂന്നു യുവാക്കളെ പൊലീസ് അറസ്റ്റ് ചെയ്തു.
🙏എറണാകുളം ചെങ്ങമനാട് അച്ഛനേയും മകനേയും കുത്തിക്കൊലപ്പെടുത്താന്‍ ശ്രമിച്ച കേസിലെ പ്രതി അറസ്റ്റില്‍. തൃപ്പൂണിത്തുറ സ്വദേശി സുനില്‍ ദത്തിനെയാണ് ചെങ്ങമനാട് പൊലീസ് അറസ്റ്റ് ചെയ്തത്. പൂവത്തുശേരി സ്വദേശികളായ ഉണ്ണി, മകന്‍ സുജിത്ത് എന്നിവര്‍ക്കാണ് കുത്തേറ്റത്.
ദേശീയം
🙏കരസേനയില്‍ ബ്രിഗേഡിയര്‍ റാങ്കിനു മുകളിലേക്കുള്ള ഉദ്യോഗസ്ഥര്‍ക്ക് ഓഗസ്റ്റ് ഒന്നു മുതല്‍ ഒരേ യൂണിഫോം. മുതിര്‍ന്ന ഉദ്യോഗസ്ഥര്‍ക്കിടയില്‍ ഐക്യബോധം വളര്‍ത്താനാണ് തീരുമാനം. മേജര്‍ ജനറല്‍, ലെഫ്റ്റനന്റ് ജനറല്‍, ജനറല്‍ പദവികളില്‍ റെജിമെന്റ് വ്യത്യാസമില്ലാതെ ഒറ്റ യൂണിഫോം ആകും. തൊപ്പി, റാങ്ക് ബാഡ്ജ്, കോളറുകളിലെ പാച്ച്, ബല്‍റ്റ്, ഷൂസ് എന്നിവയിലും ഏകീകൃത രൂപമാകും. കേണല്‍ മുതല്‍ താഴേക്കുള്ള പദവികളിലുള്ളവരുടെ യൂണിഫോമില്‍ മാറ്റമില്ല.
🙏ദക്ഷിണാഫ്രിക്കയില്‍
നിന്ന് ഇന്ത്യയിലെത്തിച്ച ചീറ്റ പുലികളില്‍ മൂന്നാമത്തേതു കൂടി ചത്തു. ദക്ഷ എന്ന പെണ്‍ ചീറ്റയാണ് കുനോ നാഷണല്‍ പാര്‍ക്കില്‍ ചത്തത്. മറ്റു ചീറ്റകളുമായി ഏറ്റുമുട്ടി മാരകമായി മുറിവേറ്റതാണ് ഈ ചീറ്റയുടെ മരണ കാരണം. ദക്ഷിണാഫ്രിക്കയില്‍ നിന്നെത്തിച്ച എട്ട് ചീറ്റകളില്‍ രണ്ടെണ്ണം നേരത്തെ ചത്തിരുന്നു.
🙏മധ്യപ്രദേശ് സാഗറില്‍ വൈദികരെ പൊലീസ് മര്‍ദ്ദിച്ചശേഷം അറസ്റ്റു ചെയ്തതു. സെന്റ് ഫ്രാന്‍സിസ് അനാഥശാലയിലെ മലയാളി വൈദികരെ പിന്നീട് ജാമ്യത്തില്‍ വിട്ടു.
🙏കര്‍ണാടകത്തില്‍ വോട്ടെടുപ്പ് തുടങ്ങി. ശനിയാഴ്ചയാണു വോട്ടെണ്ണല്‍. വന്‍ സുരക്ഷാ ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്.
🙏പാരമ്പര്യങ്ങളെ കാലോചിതമായി തിരുത്തേണ്ടത് അനിവാര്യമാണെന്നും അങ്ങനെ തിരുത്തിയ ചരിത്രമാണ് ഇന്ത്യന്‍ ഭരണഘടനയക്കുള്ളതെന്നും സുപ്രീം കോടതി. സ്വവര്‍ഗ വിവാഹത്തിന് നിയമസാധുത തേടിയുള്ള ഹര്‍ജികളില്‍ വാദം കേള്‍ക്കുന്നതിനിടെയാണ് ചീഫ് ജസ്റ്റീസ് അധ്യക്ഷനായ ഭരണഘടനാ ബെഞ്ച് ഇങ്ങനെ പ്രതികരിച്ചത്.
🙏സുപ്രീം കോടതിയില്‍ മാധ്യമ സ്വാതന്ത്ര്യ വിഷയം ചര്‍ച്ചയാക്കി ജഡ്ജിയും സോളിസിറ്റര്‍ ജനറലും. ബില്‍ക്കിസ് ബാനു കേസിനിടെ മാധ്യമ സ്വാതന്ത്ര്യത്തിന്റെ കാര്യത്തില്‍ ഇന്ത്യ 161-ാം സ്ഥാനത്താണെന്നു സുപ്രിം കോടതിയില്‍ ജസ്റ്റിസ് കെ എം ജോസഫ് പറഞ്ഞു. എന്നാല്‍ ഒന്നാം സ്ഥാനത്താണെന്ന് സോളിസിറ്റര്‍ ജനറല്‍ തുഷാര്‍ മേത്ത പ്രതികരിച്ചു.
അന്തർദേശീയം
🙏പാകിസ്ഥാന്‍ മുന്‍ പ്രധാനമന്ത്രി ഇമ്രാന്‍ ഖാന്‍ അറസ്റ്റില്‍. തെഹ്രികെ ഇന്‍സാഫ് പാര്‍ട്ടി പ്രവര്‍ത്തകര്‍ പ്രതിഷേധവുമായി കലാപം അഴിച്ചുവിട്ടു. അഴിമതിക്കേസില്‍ ഇസ്ലാമാബാദ് ഹൈക്കോടതിയില്‍ ഹാജരായ ഇമ്രാനെ അര്‍ധസൈനിക വിഭാഗമായ പാക് റേയ്ഞ്ചേഴ്സാണ് പിടികൂടിയത്. അഴിമതിക്കേസിലാണ് അറസ്റ്റ്. ഉച്ചകഴിഞ്ഞ് വന്‍ വാഹനവ്യൂഹവുമായി കോടതിയിലെത്തിയ ഇമ്രാന്‍ കോടതി മുറിയില്‍ കയറിയ ഉടനേ പിടികൂടുകയായിരുന്നു. ചെറുക്കാന്‍ ശ്രമിച്ച ഇമ്രാനെയും അഭിഭാഷകനേയും സുരക്ഷാ ഉദ്യോഗസ്ഥരേയും മര്‍ദിച്ചൊതുക്കിയാണ് സൈന്യം അറസ്റ്റു ചെയ്തത്.
🙏പാകിസ്ഥാനില്‍ കലാപം. മുന്‍ പ്രധാനമന്ത്രി ഇമ്രാന്‍ ഖാനെ അറസ്റ്റു ചെയ്തതില്‍ പ്രതിഷേധിച്ച് തെഹ് രികെ ഇന്‍സാഫ് പാര്‍ട്ടി പ്രവര്‍ത്തകര്‍ നടത്തിയ പ്രകടനങ്ങള്‍ അക്രമാസക്തമായി. സൈനിക കേന്ദ്രങ്ങള്‍ക്കും സര്‍ക്കാര്‍ ഓഫീസുകള്‍ക്കും നേരെ ആക്രമണമുണ്ടായി. കറാച്ചി അടക്കം പലയിടത്തും സര്‍ക്കാരിന്റേയും പോലീസിന്റേയും വാഹനങ്ങള്‍ കത്തിച്ചു. പാക് എയര്‍ഫോഴ്സ് മെമ്മോറിയല്‍ പ്രതിഷേധക്കാര്‍ തകര്‍ത്തു. സൈനിക ഉദ്യോഗസ്ഥന്റെ വീടിന് നേരെയും ആക്രമണമുണ്ടായി.
കായികം
🙏മുംബൈയിലെ വാംഖഡെ സ്റ്റേഡിയത്തില്‍ പാതിരാവില്‍ സൂര്യന്‍ ഉദിച്ചുയര്‍ന്നു. മുംബൈക്ക് ബാംഗ്ലൂരിനെതിരെ 6 വിക്കറ്റ് വിജയം, ഒപ്പം മൂന്നാം സ്ഥാനവും. ഐപിഎല്ലില്‍ ഇന്നലെ നടന്ന മത്സരത്തില്‍ 68 റണ്‍സ് നേടിയ ഗ്ലെന്‍ മാക്സ്വെല്ലിന്റേയും 65 റണ്‍സ് നേടിയ ഫാഫ് ഡുപ്ലെസിയുടേയും മികവില്‍ റോയല്‍ ചാലഞ്ചേഴ്സ് ബാംഗൂര്‍ നേടിയ കൂറ്റന്‍ സ്‌കോറായ 199 റണ്‍സ് വിജയലക്ഷ്യം 35 ബോളില്‍ 83 റണ്‍സ് നേടിയ സൂര്യകുമാര്‍ യാദവിന്റെ കരുത്തില്‍ മുംബൈ ഇന്ത്യന്‍സ് 21 ബോള്‍ ശേഷിക്കേ മറികടന്നു. 42 റണ്‍സ് നേടിയ ഇഷാന്‍ കിഷന്റേയും 52 റണ്‍സ് നേടിയ നെഹാല്‍ വധേരയുടേയും പ്രകടനം മുംബൈ വിജയത്തില്‍ നിര്‍ണായകമായി.
🙏അര്‍ജന്റീന സൂപ്പര്‍ താരം ലയണല്‍ മെസ്സി സൗദി പ്രോ ലീഗ് ക്ലബ് അല്‍ ഹിലാലുമായി കരാറിലെത്തിയെന്ന വാര്‍ത്തകള്‍ തള്ളി താരത്തിന്റെ പിതാവും മാനേജറുമായ യോര്‍ഗ മെസ്സി. നേരത്തെ ക്രിസ്റ്റ്യാനോ റൊണാള്‍ഡോയ്ക്ക് പിന്നാലെ അര്‍ജന്റീന സൂപ്പര്‍ താരം ലയണല്‍ മെസ്സിയും സൗദി ലീഗിലേക്കെന്ന് റിപ്പോര്‍ട്ടുകളുണ്ടായിരുന്നു. ഇത്തരം വാര്‍ത്തകള്‍ വ്യാജമാണെന്ന് കടുത്ത ഭാഷയില്‍ തന്നെ വ്യക്തമാക്കിയ യോര്‍ഗെ മെസ്സി, തന്റെ മകന്റെ പേര് ആളെക്കൂട്ടാന്‍ ഉപയോഗിക്കുകയാണെന്നും തുറന്നടിച്ചു.
